Home Politics Parlamentario Hendrik Tevreden B.sc. di MEP: 150 miyon dollar! Un ta kier...

Parlamentario Hendrik Tevreden B.sc. di MEP: 150 miyon dollar! Un ta kier un kier, ma ta por un POR.

ORANJESTAD – Dialuna den conferencia di prensa e minister encarga cu medio ambiente sr. Otmar Oduber a duna indicacion cu Gabinete Wever – Croes I, lo opta pa bin cu un ‘incinerator’ pa crea gas of coriente. Un pensamento noble y heroico sigur ora ta trata pa remedia e area di dump na Parkietenbos. Pero tin un cantidad di aspecto cu tin di tuma na cuenta prome cu tuma e paso aki, segun Parlamentario Hendrik Tevreden.

Nos tur ta di acuerdo cu e problema na dump tin di conoce un solucion y nos tur sa cu tin diferente forma pa haci esaki. Si mi ta di opinion, cu cualkier forma cu scoge pa implementa esaki tin di percura pa e ta un forma responsabel den tur sentido di palabra. E minister en cuestion ta sugeri cu aki lo ta papiando di un inversion sigur rond di 150 pa 200 miyon dollar pa loke ta ambos fase, y na mes momento ta splica cu no tin tempo pa pospone.
Algo cu como representante di pueblo mi tin di remarca cu ta hustamente algun di e factornan cu netamente e gobierno Eman II no a tene cuenta cu nan, esta tempo y placa, cu tin nos como Pueblo ta come e ‘sopi di desaster financiero’ salo y pura aki.

Rapportnan
Mas cu tur cos nos kier remedia e situacion y e peliger pa nos comunidad y ciudadanonan pero nos tin di haci esaki na un forma responsabel y den ordo. Nos ta na altura cu tin consehonan den e ultimo rapport di e organisacion PAHO cu tin di atende cu e situacion serio aki, pero asina tambe nos a hereda un situacion financiero hopi serio cu tambe tin di wordo remedia segun diferente otro rapportnan. Mas ainda Aruba tin un situacion social pa remedia, un situacion di enseñansa pa remedia y un situacion economico pa remedia. Mi kier enfatisa cu ariba tur e puntonan aki tin rapportnan cu ta conseha nos como Pais pa no pospone, sinembargo nos realidad financiero ta permiti nos solamente asina hopi. Actualmente debenan di Aruba ta na 93% di su GDP cu ta nifica cu di cada 1 florin, 93 cen ta bay na paga debe, esaki danki na falta di control di e Parlamentarionan di AVP y e ‘filosofía Eman’ di un tiki mas den rood cu mi ta kere ta responsabel pa no ripiti.

Prioridad
Den comisionnan fiho di Parlamento nos a haya diferente presentacion y tambe a scucha diferente profesional den e ramo di desperdicio y ta di opinion cu e prioridad na Parkietenbos ta e desperdicio y no necesariamente crea gas of produci coriente. Esey ta nifica cu nos tin di elimina e desperdicio pa e bienestar di nos hendenan pero no necesariamente cu un ‘incinerator’ di 150 miyon pa 200 miyon dollar. Alcontrario tin hasta oportunidad pa Aruba por ricibi un entrada pa e sushi na Parkietenbos.
Den e forma cu lo bay atende cu e sushi na Parkietenbos nos lo tin di tene cuenta cu tres paso importante: 1. Pagabel 2. Aceptabel pa comunidad y 3. Confiabel (Calidad). Manteniendo nos mes na e pasonan aki nos lo por percura pa soluciona un problema crea pa decadanan na un forma duradero y responsabel.
Naturalmente diferente na e Parlamento anterior nos fraccion lo invita minister den un encuentro pa e por duna un splicacion mas detaya na Parlamento y hunto intercambia pensamento ariba un punto asina importante y necesario pa nos comunidad y specialmente pa Parkietenbos y vecindario.
Esaki ta parti di e trabou y deber cu mi tin como representante di mi Pueblo, pa por controla y percura na e maximo di mi habilidad pa Aruba wordo goberna na e mihor forma posibel. Nos inversionnan, y remediacion tin di bay man den man cu nos situacion financiero actual, pasobra un ta kier un kier, ma ta por un por.