Home Politics Parlamentario di AVP, Michael Lampe: Ta hungando politica cu stranheronan

Parlamentario di AVP, Michael Lampe: Ta hungando politica cu stranheronan

Cu man crusa lo no soluciona e reto di stranheronan indocumenta
Ta sinti cu Minister Presidente Wever a laga su colega Glenbert Croes cay!

ORANJESTAD, Aruba: Na e momentonan aki na DIMAS tin un situacion preocupante relaciona cu e cantidad di stranheronan indocumenta cu ta aplicando pa un status di “refugiado”, pidiendo pa asilo politico. Fraccion di AVP ta siguiendo e situacion di cerca, a bin diferente preocupacion padilanti y preguntanan cu ta surgiendo. Hopi ta cuestionando Minister Andin Bikker, kende ta mustra di ta para neutral, ta paralisa y no por tuma un decision directo den e caso aki.

Diahuebs merdia, despues cu a nota cu e situacion na DIMAS a bay for di man pafo, e Parlamentario a opta pa bishita e departamento pa pone su mes na altura di e situacion. Pafo el a combersa cu varios stranhero cu a splik’e di nan situacion den nan pais, con a gaña nan na Aruba y hunga cu nan sentimentonan. E Parlamentario a haya un audiencia cu Director di DIMAS, kende a splik’e di e situacion reinando y e reto cu e “mal informacion” aki a causa pa e operacion di e departamento.

Parlamentario di Fraccion AVP, Michael Lampe, ta considera e asunto aki preocupante pasobra a priminti hopi durante campaña. Tin un video claramente di actual Minister Glenbert Croes, primintiendo amnistia na e stranheronan asina cu MEP drenta gobernacion. Parlamentario Michael Lampe ta kere cu a crea un caos aworaki, a priminti algo y esaki ta pone cu stranheronan ta sali y busca loke a priminti. Awor ta mustra cu a abusa di hendenan door di a hunga politica, lagando nan para for di marduga dilanti DIMAS pa despues bisa cu lo NO otorga asilo.

Awor no tin un decision serio di loke ta bay pasa cu e personanan aki. Fraccion di AVP a nota cu na inicio di aña Prome Minister Evelyn Wever a splica cu tin miles di ilegal na Aruba, pero Fraccion di AVP kier sa kico a haci pa soluciona e problema aki. Man crusa hamas lo no percura pa e ciudadanonan aki sea bira legal of bandona nos isla. Nan ta aki caba, pues e ta un problema latente cu Minister Bikker y henter e Gobierno MEP-POR-RED lo mester atende. Ta nota cu no a trata e tema aki den forma responsabel y esaki ta trece cune un confusion grandi y un situacion caotico. Stranheronan ta buscando loke a priminti na nan, loke a bisa nan!

Minister President a sali y a laga su colega di partido Glenbert Croes cay den su lucha pa duna Asilo Politico den forma di amnistia na stranheronan permaneciendo na Aruba. Tambe por ripara claramente cu den e situacion aki, Minister di Husticia, mr. Andin Bikker, no a yega y tuma un decision riba kico ta bay sosode. Ta for di hopi aña e ta aspira e stoel di Minister di Husticia, pero desde cu e ta sinta eyriba awo, ta blunder tras di blunder, banda di un criminalidad creciente y for di proporcion.

“Mi ta lamenta masha e forma con ta trata hende. E Gobierno aki a bisa cu pa nan hende ta central, pero dor di gaña nan, dor di uza nan den campaña, priminti nan amnistia y awor nenga nan, ta un forma cla pa tur hende cu e grupo aki no ta capaz pa goberna y tuma decisionnan, pio pa para pa nan promesanan”, asina Michael Lampe a termina bisando.