Home Local Riu Palace Aruba y Riu Palace Antillas a celebra Dia di Mama

Riu Palace Aruba y Riu Palace Antillas a celebra Dia di Mama

ORANJESTAD, Aruba: Riu Palace Aruba y Riu Palace Antillas a celebra Dia di Mama pa e turistanan y empleadonan cu ta mama. E dia a bay den un ambiente ameno unda cu tur hende a disfruta di e celebracion.

Riu Palace Aruba a haci 3 actividad p’e muchanan, kendenan a traha algo bunita pa nan mama. E muchanan por a scoge entre decora un cupcake, planta un mata pa duna mami of traha un carchi pa mami, kendenan kier a haci algo leuk pa nan. E turistanan a gusta masha hopi mes y tabata asina contento pa mira nan yiunan traha algo pa nan. Despues di a traha nan regalo, nan a duna e mamanan e regalo.

E muchanan a planta mata como regalo pa nan mama y esaki tabata algo cu Riu Palace Aruba semper a haci, unda ta pa purba conscientisa e muchanan over di medio ambiente. E muchanan tabatin un sonrisa grandi na nan cara di por a haci diferente regalo pa nan mama. Tambe tabata presente e mascota di Riuland Calú y tur mucha tabata saca potret.

E celebracion a sigui den e Cafeteria yena cu blaas di “Happy Mother’s Day” p’e empleadonan mama, unda Riu Palace Aruba y Riu Palace Antillas a haci entrega di un rosa na tur mama. E empleadonan a keda super feliz cu e detaye aki. Empleadonan a keda feliz cu e gesto aki. A gradici management team p’e detaye chikito y a corda ariba nan.

Den oranan di anochi ambos hotel tabatin dinner p’e mayornan. Na Riu Palace Aruba e mamanan a ricibi un rosa, champagne y tambe por a disfruta di e canticanan bunita cu e saxofonista tabata toca. Na Riu Palace Antillas e anfitrionnan tabata duna e mamanan un rosa y tabata sinta nan na nan mesa. Tur hende a pasa un dushi anochi durante e celebracion di Dia di Mama.

RIU Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.