Hospital a eligi nan empleado di luna di april cu e biaha aki ta procedente di laboratorio y p’esey a sorpende e persona aki durante “Medical Laboratory Professionals Week”. Zulaika Zievinger, kende ta un “Analytisch Assistent” no a spera esaki y a keda hopi contento di tende con su coleganan ta aprecia su trabou. Director di Cuido na Dr. Horacio E. Oduber Hospital, sr. Ezzard Cilié, durante su discurso a subraya e cualidadnan cu a haci Zulaika Zievinger e empleado di luna.
Sr. Ruud Bakas, manager na LabHOH, a duna di conoce cu Zulaika Zievinger ta un part-timer den laboratorio y su trabou ta pa prik pashent. Zulaika ta wordo mira como un di e miho empleadonan cu ta coy sanger. E ta un di e empleadonan cu tin mas tempo trahando den laboratorio y semper e ta busca otro forma con pa trata e pashentnan miho, pero tambe con nan tur por traha hunto pa tin un miho cuido integral pa pashentnan. E ta un persona hopi profesional y amabel cu pashent y tambe su coleganan. Pafo di ora di trabou e mes ta tuma iniciativa pa traha riba rooster y ta tuma yamada di colega cu tin pregunta. Ademas, e mes ta bin cu proposicionnan pa mehoracion. E ta siña y comparti cu otro pa asina continuamente trece mehoracion den e team. Ademas, e ta un persona integro. Tur esakinan tabata puntonan cu mas a resalta cu a pone cu a scoge Zulaika Zievinger pa ta empleado di luna.
Zulaika ta conta cu e tin 11 aña trahando den laboratorio y ta haya leuk cu nan ta wordo balora p’e trabou cu nan ta haci. Loke mas e ta gusta di su trabou ta cu tur dia nan ta trata diferente hende y pashent. “Mi gusta mi trabou y tur dia mi ta bin trabou cu smaak”, asina Zulaika Zievinger a duna di conoce. Den su area di trabou tur dia e ta mira cara nobo, ta conoce hende, tin contact cu pashentnan.
E team cu Zulaika Zievinger ta traha cun’e ta uno hopi uni, unda cu nan ta traha dilanti pa prik pashent y tur ta haci nan miho esfuerso. Nan ta sigui traha asina na bienestar di pashentnan, pasobra pashentnan ta na prome luga, el a duna di conoce.
Zulaika ta un empleado ehemplar y tin curason pa su trabou. Zulaika ta e persona cu ta conecta ful e team y ta percura pa tur cos funciona bon. Semper e ta busca solucionnan pa mehora e tareanan diario di su coleganan y ta masha servicial yudando e pashent unda cu por. Masha pabien Zulaika cu e reconocemento bunita aki.