Home Local Cu tema principal “Health is a human right” Siman di enfermeria na...

Cu tema principal “Health is a human right” Siman di enfermeria na hospital educativo y dibertido

ORANJESTAD, Aruba – 16 di Mei 2018: Hospital a celebra e siman di enfermeria, cu tabatin un tremendo acogida. E celebracion completo sigur a surpasa e expectativa di henter e comision organisatorio. Un siman na unda a pone enfasis riba e tema principal cu ta Health is a human right” y tambe riba tur empleado di Hospital cu anualmente ta contribui na e cuido di pashent. E comienso di e siman di enfermeria tabata uno bunita na unda a elogia tur nurse y a pone atencion riba algun trayecto cu nan a cana pa yega na nan meta como enfermero. Tur nurse cu a participa den e siman di enfermeria a disfruta di esaki y tabata contento di por a celebra nan dia.

Durante e apertura diferente persona a hiba palabra na coleganan den enfermeria. A scoge e aña aki pa un localidad nobo cu a wordo hopi bon ricibi, asina Indra Poulina, Voorzitter Commisie Week van de Verpleging 2018, a duna di conoce. Un ambiente ameno na unda na final a pasa un video di diferente nurse di nos Hospital contando nan storia y nan trayecto. Un iniciativa cu ta di elogia.

Manera tur aña un biaha mas a organisa e desayuno tradicional y esaki tabata bon bishita como un toke di aprecio pa tur hende cu ta traha den hospital. hende a gusta, y nos tambe a gosa”, asina Indra Poulina a duna di conoce. E aña aki alabes a parti un powerbank pa tur cu ta traha na Hospital cu tambe a ser bon ricibi.

Diabierna tabata e clausura di e siman di enfermeria cu a sosode den forma di un evento multicultural cu tabata consisti di un food festival combina cu Nurses week games. Por a gosa di cumindanan di diferente cultura y teams di diferente departamento a hunga contra otro cu ta yuda cu teambuilding. Despues di e actividadnan e prome luga a bay pa team Sam Sams di ICU cu 13 punto, na di 2 luga a keda Lab Rats cu 12 punto, na di 3 luga a resulta Frenemies cu 10 punto, na di 4 luga a keda Super Scrub nurses cu 8 punto y Team Brain Damage na di 5 luga cu 7 punto.

E comision kier a tuma e momento aki pa gradici tur hende cu a haci e siman aki posibel. No por keda sin menciona Hunta di Directiva y tur manager cu a percura cu tur nurse y esunnan trahando por a forma parti di e actividadnan, tambe e HVTers, y tur miembro di comision pa nan contribucion. Tambe kier a gradici sra. Jessy Leon di departamento di comunicacion, kende a haci un tremendo trabou di a promove actividadnan pa asina tur hende por a yega. “Sin e sponsornan cu ta hopi pa menciona e siman aki no lo por tabata posibel” danki di curason, sra. Poulina a termina bisando.