Minister Dangui Oduber ta sumamente satisfecho cu otro proyecto mas cu lo eleva calidad di e producto Aruba. Gobierno di Aruba den cooperacion cu RIU Antillas lo percura pa un renobacion di e pier dilanti di hotel RIU Antillas.
E vision di minister di turismo ta pa percura pa trece turistanan di calidad pa Aruba. Den cuadro di esaki minister kier mehora producto Aruba y tambe mehora e servicio cu nos ta brinda na nos bishitantenan. Minister di turismo ya caba a tuma varios decision pa mehora infrastructura den e area di High-rise hotels pa asina por eleva e calidad di nos producto. E deseo di minister ta pa sector priva, den e caso aki hotelnan tambe inverti den mehoracion di nan producto y asina nan tambe contribui den e mehoracionan aki pa pais Aruba. Minister Oduber a dicidi pa tuma contacto cu gerente general di hotel RIU Antillas pa asina splica kiko ta e intencion di gobierno y tambe pidi cooperacion pa renobacion di e pier dilanti RIU Antillas. Ta conoci cu e pier aki e ultimo añanan tabata den mal estado cual ta haci cu esaki a bira un peliger no solamente pa nos turista nan pero tambe pa localnan cu ta haci uzo di esaki.
Riu Antillas a mustra disponibilidad mesora y a dicidi di haci un inversion grandi pa drecha esaki. Minister Dangui Oduber a keda sumamente satisfecho cu e “public-private partnership” aki y esaki sigur ta un ehempel di con gobierno y sector priva ta traha hunto pa mehora producto Aruba. Aruba lo por ta orguyoso di tin un pier completamente renoba y safe pa nos turista y localnan.