Home » No solamente den forma represivo, pero awor preventivo tambe AHATA orguyoso cu e sosten di Polis den cuido di nos medio ambiente

No solamente den forma represivo, pero awor preventivo tambe AHATA orguyoso cu e sosten di Polis den cuido di nos medio ambiente

by Admin
0 comment 86 views

ORANJESTAD, Aruba – Aruba Hotel and Tourism Association (AHATA), cu den su obhetivo nan tambe ta inclui preserva y cuida nos medio ambiente, ta masha contento di tuma nota cu Cuerpo Policial Aruba ta haciendo esfuerso adicional pa cuida nos medio ambiente. AHATA ta contento cu desde aña 2000 caba cu ta hibando como maneho interno den Cuerpo Policial, cu asina un klas sali for di Academia di Polis, cu e aspirant ta haya como un “opdracht” pa atende un proyecto basa riba conscientisacion of mehoracion di diferente aspecto di nos medio ambiente.

Dia 9 di Mei pa 10:30am AHATA a bay na e Warda di Polis na Macuarima y aki oficialmente a haci entrega di plakkaat na e Klas 2012. AHATA a entrega nan e plakkaat dilanti di Alto Comisario, Minister Andin Bikker y otro oficialnan.

Asina por corda ainda cu e klas di aña 2011 a presenta e proyecto di turtuga, pa conscientisa pueblo di e importancia di turtuganan. Klas 2012 a presenta y traha durante aña 2016 riba e proyecto “Evenementen op Strand”, den cual a atende tur e diferente eventonan cu ta organisa riba beach. Den e proyecto, e Polisnan hoben a sugeri un cantidad di condicionnan cu por impone riba e organisadonan, den cual ta percura pa e daño na medio ambiente ta minimo of nada.

AHATA como tal ta masha orguyoso di e grupo di Polis Klas 2012 cu danki na nan proyecto y esfuerso nan a logra pa un evento move for di Eagle Beach na e area di ex Bushiri hotel y nos ta spera cu mas eventonan lo ser asigna na areanan cu no ta daña nos medio ambiente. Tur hende por haci un diferencia, mas hende aporta, mas consciente nos comunidad ta, miho nos medio ambiente!

E organisacion di Hotelnan y Turismo di Aruba tabata sinti e necesidad di mas sosten di otro partnernan den comunidad y sin duda Polisnan ta un man importante den e lucha pa cuida y preserva nos medio ambiente. Claro cu Polis tin e autoridad pa actua den forma represivo, pero awor ta opta tambe pa duna un man substancial den esfuersonan preventivo, locual sin duda ta masha di elogia y ta di aprecia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio