Parlamentario Arthur Dowers Dos polis den parlamento a sostene mocion di partido RED cuestionabel

Durante tratamento di presupuesto 2018, por a tuma nota di maniobranan cu wordo haci tanto pa loke ta uzo di cannabis medicinal como otro pa personanan cu comete un crimen y sinta dos aña di castigo di prizon, haya un carta di buena conducta ora cu nan bandona prizon.
Parlamentario Arthur Dowers ta mustra cu loke ta mas serio di e mocionnan aki presenta pa RED, ta e hecho cu dos polis a sostene e mocionnanaki.
“Ora cu lesa e mocionnan aki, por ehempel esun pa elimina discriminacion pa uzo di cannabis medicinal pa e grupo di Rasta, ta un forma cla pa pasa parlamento un fastball ya cu dificil a mi kere cu henter e comunidad Rasta aki na Aruba, tur ta hendenan cu ta sufri un kebrante di salud, cu tur tin dolor di cabes of otro enfermedad.
Pa colmo un mocion asina ta conta cu firma di dos polis den Parlamento y tambe nos por a mira otro mocionnan cu a wordo presenta caminda propio coleganan di coalicion a pasa otro fastball y ta duna e impresion cu nan no a lesa e mocionnan pero simplemente a firma y sostene esakinan.
Otro mocion cu a sorprende nos ta caminda ta pidi gobierno pa bay di acuerdo pa haci posibel cu hendenan cu ta sintando castigo largo den prizon, si nan sinta dos aña consecutivo, nan bin na remarca pa haya un carta di buena conducta ora cu nan bandona prizon.
Un hende cu a sinta dos aña den prizon ta un hende cu a comete un crimen di peso, un crimen pa cual e lo a ricibi un castigo di tres, cuater of hasta 10 of mas aña y kende a wordo haya culpabel di un crimen hopi serio.
E ora ta lanta e pregunta ta kico ta haci e ora pa esunnan cu a comete un crimen menor, cu mester sinta un aña, algun luna of simannan, nan ta wordo neglisha por completo y mester yuda esunnan cu a comete un crimen mayor.
Den e proceso cu nos conoce aki na Aruba, un hende cu bay cera ta wordo prepara den e instituto coreccional pa e por bin bek den comunidad y envolvi su mes como un persona cu ta rehabilita y kier sigui cu su bida respetando leynan cu tin.
Hendenan cu a traha den cuerpo policial mester tin mas conocemento di kico husticia ta encera, mester por sa kico por wordo haci of no pero ta simplemente core firma un mocion asina, ta muestra di un mentalidad cuestionabel,” Parlamentario Arthur Dowers a declara.