ORANJESTAD, Aruba – Fraccion di AVP a tuma nota y a keda sorprendi cu Minister di Husticia, mr. Andin Bikker a opta pa pidi “harde bijstand” di Cuerpo Militar den apenas 6 luna di gobernacion, ya pa 2 biaha caba! Parlamentario di Fraccion di AVP, Robert Candelaria ta kere cu esaki no ta un desaroyo corecto ya cu na Aruba tin profesionalnan bon forma y ekipa y tur cos. Ta obvio cu tur e fraccionnan den Parlamento ta tratando e topico di siguridad riba mesun linea.
E Parlamentario ta contento di mira cu e Fraccion di MEP a bisa di ta riba e mesun liña y ta pensa den e mesun direccion cu AVP. Aworaki ambos Fraccion den Parlamento ta riba mesun frecuencia y esaki ta di 2 biaha cu ta advertiendo Minister di Husticia Andin Bikker pa reevalua su decisionnan. Tin aspectonan cu mester trata nan rapido, tambe decisionnan mara na liderazgo cu no por keda bira rond di nan.
Aworaki den Parlamento tin discusion riba e topico di radar. Parlamentario Candelaria di AVP ta haya cu awo no ta tempo di discuti ken su culpa, cua aña y dicon. Pero awo cu ta papiando di radar, asina mes hende ta keda drenta. Na e momentonan aki loke mester percura cun’e ta con pa handle, pasobra Gobierno tin algun luna na mando caba y no ta notando ningun cambio y pio un adelanto den e forma pa atende cu e retonan na costa, siendo cu awor tin mas boto yegando cu ilegal cu antes.
Siman pasa Fraccion di AVP a bisa cu pa lunanan tin autonan para cla pa haci control, esta pa Polis, Kustwacht y Duana. Parlamentario Candelaria kier sa con ta posibel cu pa 6 luna largo pa un aspecto di “invoerrechten” e asunto aki a keda para. Esaki ta mescos cu e topico di radar, di cual ta un topico cu mester atende cun’e rapidamente. Esaki ta bin pa motibo cu cada dia cu keda papia y keda tarda, e comunidad di Aruba ta core peliger.
E hendenan aki ta keda mira Aruba como un “target” y a yega na un periodo cu no por sigui cu esey asina mas. “Nos mester bisa cu ta basta”, asina Parlamentario Candelaria a expresa. Fraccionnan den Parlamento ta papiando di e tema aki na e mesun idioma. Ta spera cu Minister di Husticia por tuma esaki como un advertencia serio y atende cu esaki na bienestar di comunidad.