Diabierna mainta Prome Minister Evelyn Wever-Croes a ricibi bishita di Prinses Laurentien y Prins Constantijn kendenan ta na Aruba pa un bishita priva y a tuma e oportunidad pa haci un bishita pa cera conoci cu Premier Wever-Croes y Gobierno di Aruba.
Durante di e encuentro hopi ameno aki, a intercambia di ideanan riba varios puntonan. Entre otro, Prome Minister a splica con e Gobierno actual a encontra gobernacion y cua ta e retonan di mas grandi cu Gobierno a encontra den e ultimo cinco lunanan. E tema finaciero, social, y enseñansa tambe ta puntonan cu a wordo treci dilanti. A enfoca riba e rol y bienestar di nos muchanan den enseñansa.
Sabiendo cu Prins Constantijn ta un promotor di innovacion, ‘start ups’ y ‘entrepreneurship’, a elabora riba e plannan cu Aruba tin riba e terenonan aki. E Prins a ofrece su ayudo y asistencia.
Prinses Laurentien ya pa basta aña ta hopi involvi cu “Raad voor de Kinderen”. Un conseho di muchanan den cual ta duna muchanan bos den desicionnan importante di Gobierno hibando mes un pensamento cu nos tin na Aruba cu muchanan ta central. A yega na hopi palabracionnan hopi contundente con nos por traha hunto siguiendo padilanti.
“Esaki tawata un reunion hopi importante cu por a cera conoci cu otro. E Pareha a enfatisa cu nan ta encanta di ta na Aruba. Ta bisto cu e relacion entre Aruba y Reino ta bayendo den e bon direccion aunke ainda nos no ta na unda nos mester ta. Ainda tin hopi desconfiansa. Sinembargo Gobierno di Aruba ta trahando pa mehora esaki. Hunto nos ta logra”, Prome Minister a bisa.