Fin di luna di April presupuesto di Pais Aruba a keda aproba den Parlamento di Aruba. Esunnan cu a sigui e reunionnan aki di cerca por a ripara cu e coalicion completo a para firme pa e suma di 17 miyon florin bay pa ehecucion di e Crisis Plan. Desde aprobacion di presupuesto, diabierna tabata e prome dia di reunion pa cu ehecucion di e Crisis Plan Social.
E reunionnan aki a bin ta tuma lugar regularmente desde e caso di Rishandroh y Roshendrick. Manera nos tur por corda, e momento cu e caso di e dos angelitonan aki a sosode, Minister Glenbert Croes a yama un reunion urgente pa tur hunto presenta solucionnan cu por acapara y transforma nos problemanan Social. Desde fin di november e reunionnan aki a bin ta tuma lugar regularmente. Pero e reunion di diabierna tabata e prome cu e suma di 17 miyon florin na disposicion di tur e partner y stakeholder di e mundo Social pa conhuntamente nos rescata nos Pais, nos muchanan, nos hobennan, nos grandinan.
Minister Glenbert Croes ta gradici e participacion di tur partner y stakeholder. “E seriedad y e intensidad di nan participacion, ta yena mi cu e conviccion cu e futuro social di nos Pais ta riba e bon caminda. Hunto nos ta trahando duro pa logra rescata nos Pais. Y hunto nos lo logra cambionan significativo y importante” tabata palabranan di e mandatario.