Dia 21 di februari Gobierno di Venezuela a pidi Ministerio di Asuntonan Exterior di Reino pa bay di acuerdo cu nombracion di sr. Carlos Jose Mata Figueroa como e consul general nobo di Venezuela na Aruba.
Dia 27 di februari Ministerio di Relacionnan Exterior di Hulanda a informa cu lo tuma e peticion den tratamento.
E procedura a cana su curso normal y recientemente a finalisa y dia 1 di mei Venezuela a wordo informa cu Reino ta bay di acuerdo cu su admision.
Nombracion di Consul Generalnan den partinan Caribense di Reino ta un asunto cu ta wordo trata na nivel di Reino. E decision a wordo tuma den deliberacion cu Gobierno di Aruba, asina Gobierno di Aruba a informa.
Riba pregunta di prensa cu si e nombracion aki tabata parti di e negosacion entre Minister Stef Blok di Hulanda y autoridadnan Venezolano dia 7 april ultimo na Caracas, Minister Presidente Evelyn Wever-Croes a indica cu manera cu el a wordo informa, Minister Blok no a haci ningun compromiso na Venezuela. E tema a wordo treci dilanti si di parti di Venezuela.
E peticion di Venezuela a wordo trata segun procedura normal. E proceso di screening pa cu acreditacion di e consul tambe a wordo aplica y e screening no a duna indicacion di hechonan cu por a stroba e acreditacion, Prome Minister a indica riba preguntanan tocante posibel antecedentenan criminal di e persona en cuestion.
Pues den e caso aki no lo tin ripiticion di e caso di Carvajal pasobra e procedura corecto a wordo sigui pa tanto Venezuela como Reino den caso di nombracion y admision di sr. Mata Figueroa como consul general di Venezuela na Aruba.