Siman pasa nos a trata presupuesto 2018, esta dia 25 di april 2018 esaki a ser aproba den oranan di marduga pa Parlamento y cu e dia siguiente Gobernador a firma esaki. Esaki ta muestra di confianza den gobierno unda cu a entrega un presupuesto basa riba cifranan real, pues un presupuesto cu ta duna pueblo e speransa cu Aruba lo conoce un cambio pa miho.
Madurez politico
Durante tratamento di e presupuesto nos a toca e aspecto di DPS. Esaki ta keda un punto di preocupacion bao di cuerpo di docentenan di DPS, pero ta algo cu nos como parlamentario a atende debidamente. Den nos bishitanan na scol nos a bin topa cu e punto di independisacion di DPS. Mi persona a reuni cu varios scol hunto cu colega parlamentario Shailiny Tromp-Lee, unda cu e docentenan tabata vocifera nan preocupacion. Basa riba esaki mi persona a pone 2 punto importante dilanti: 1. Pa Minister Rudy Lampe reuni cu docentenan y convence nan pa bay den e independisacion di DPS. 2. Cu unabes nan tin e draagvlak sigur nos di parlamento lo apodera e Minister pa lanta e fundacion. Pero ora cu Minister Lampe a reuni cu e maestronan cos a bira pio y unda cu docentenan a pidi pa reuni cu mi persona y fraccion di MEP, pero mi persona a opta pa invita tur fraccion, pues di RED, POR y AVP pa ta presente y p’asina mustra madurez politico. Na final di e reunion tur fraccion a para hunto cu mi ponencia, unda cu e minister mester tin e draagvlak pa sigui cu esaki. Si e no tin esaki e lo no ser sosteni pa haya e apoderacion pa lanta e fundacion.
Accion di firma
Docentenan no a keda nada convenci cu splicacion di Minister Rudy Lampe y a cuminsa un accion di firma unda cu nan ta pone nan puntonan di preocupacion y cu docentenan di scolnan publico incluyendo docentenan di EPI no ta sostene e privatizacion di DPS. E firmanan colecta a ser entrega na Minister y tambe na mi persona y mi ta gradici nan pa e confianza pa cu esaki pasobra e grupo di docentenan sa cu nos ta tuma nan trabao y nan posicion huridico hopi na serio y cu trabao di hende nos no ta haci wega. Y durante tratamento di e presupuesto Minister Rudy Lampe a enfatisa cu e lo pone e asunto di DPS un banda debi cu e no tin e sosten di e cuerpo di docentenan. A bin un mocion di parti di colega di parlamento sra. Jennifer Arends-Reyes pa suspende definitivamente e asunto di DPS. Nos a sostene e mocion aki como muestra di madurez politico. Alavez nos ta contento cu 9 mocion cu mi persona a traha cu ta regarda entre otro mocionnan di deporte, enseñanza y tambe uno social a ser sosteni. Como ehempel di un mocion ta e mocion pa aumento di 50% di deduccion di studielening ora paga esaki den un solo pago pa studiantenan y cual mocion a ser aproba unanimamente.
Trankilidad
Ta pesey un biaha mas mi ta gradici esnan di e cuerpo di enseñanza pa nan confianza pa duna mi persona e apoderacion di por para pa nan y papia den nan nomber, unda cu si e Minister di Enseñansa no tin un draagvlak e independisacion di DPS lo no por ser concretisa. Y sigur mi persona na e momentonan aki ta representa pueblo y e cuerpo di docentenan ta parti di pueblo unda cu nan puntonan di preocupacion ta valido, pero locual ta duna nan mas valor ainda ta nan curashi pa pone nan firma unda cu nan ta duna di conoce cu nan no kier bay pa DPS ser privatisa y sigur nos di parlamento tin e instrumento pa esaki no pasa y cu nos di parlamento tin di para pa pueblo. Pesey durante reunion mi a duna mas importancia na e firmanan cu na e mocion cu na final di dia ta un deseo mientras e firmanan ta duna e apoderacion pa papia y actua conforme voluntad di un cuerpo di docente, cu awor por ta mas trankil y por dedica e ultimo simanan pa haci lo maximo pa mas hoben por pasa nan aña y otronan por pasa nan examen cu exito.