ORANJESTAD – Minister di Finanzas, Asunto Economico y Cultura Sra. mr. Xiomara Ruiz-Maduro durante tratamento di Presupuesto 2018 a trece e berdad di nos finanzas publico hereda for di e Gobierno anterior. Gabinete Wever-Croes a entrega un presupuesto cu mester tabata entrega prome cu 1 september 2017, pero Gabinete Mike Eman no tabata tin decencia pa entreg’e na ora.
Pero Dios Gracia cu Pueblo a scoge pa cambio p’asina e Gobierno nobo aki por percura p’e pais aki por para fuerte atrobe riba su pianan.
E mandatario a trece dilanti cu awor hopi ta papia y kier critica, cuestiona pero nan maneho, referiendo na Gobierno di AVP, a hiba nos pais riba rudia cu e peso di debe cu nan a laga atras. Un debe cu nan a haci pa cumpra voto, pa manipula hende, pa controla y persigui hende.
E ex-ministernan di e pais aki a djies fia pa por a goberna. Minister Ruiz-Maduro a sigui trece dilanti cu tur hende por goberna haciendo debe na grandi. E Gobierno di AVP a fia te nan a redobla e debe di e pais aki den solamente 8 aña di tempo.
“E cos aki ta un crimen, pero cu yudansa di nan mayoria den Parlamento, e fraccion di AVP a legalisa mayoria di nan crimen. Te ora anochi no cera, careda di bina no ta caba. Investigacion lo sigui y tur berdad lo sali na cla y tur locual por wordo penalisa, nos ta haci un apelacion fuerte na Ministerio Publico pa nan atende cu nan diligente- y debidamente”, Minister Xiomara Ruiz-Maduro a vocifera.