Parlamentario Benny Sevinger Presupuesto 2018 na luga di baha debe cu medida ta aumenta debe

Gobiernonan di MEP semper a goberna cu medida y e biaha aki no ta diferente, Parlamentario Benny Sevinger di fraccion di AVP ta mustra, apesar cu durante di campaña electoral di 2017, MEP a sigura pueblo cu e tin solucion pa e situacion financiero sin medida.
“Nos no por cataloga presupuesto 2018 cu nada otro cu ta medida ya cu partido MEP den gobierno semper a caracterisa su mes pa tres cos cu ta medida, persecucion politico y tuma friends & family den servicio di gobierno aumentando debe.
Por ehempel ta tuma medida, apesar cu nan a bay eleccion bisando pueblo cu tin un mega debe y cu nan lo bay soluciona esaki sin medida. Nan a drenta gobierno sin plan y prome cos cu nan ta haci, bin cu medida manera AZV, BAZV, BBO, hisa accijns riba gasolin, impuestonan ta bay subi, permisonan ta bay subi y tur esakinan ta medida cu lo bay bin ainda den e gabinete aki.
Apenas nan a drenta gobierno y sin bay sinta cu sindicatonan of doñonan di trabou pa wak ki solucion por tin pa retonan cu tin, manera nos so di AVP a haci ora cu nos a drenta gobierno manera Mike Eman a sinta cu tur hende y a mustra riba e retonan y bisa con asina ta bay soluciona esakinan.
MEP simplemente a gara e cos di mas facil, esta bin cu medida y pueblo tin cu paga y si nan ta bin cu medida cu pueblo ta paga y nan ta bay haci loke nan ta bisa, esta paga e debe cu’ne ta otro cos pero loke nos por mira awe no ta bay paga debe, al contrario ta bay aumenta e debe.
Ora bo ta den un cas y bo tin debenan, bo tin entradanan y na momento cu bo entradanan no ta cuadra cu bo debenan, bo por haci dos cos, aumenta bo entradanan dor di bay haci trabounan extra of baha bo gastonan dor di corta por ehempel den gastonan cu bo ta haya no ta necesario den bo hogar.
E gobierno aki ta bisa cu su entradanan ta menos cu su gastonan pero loke e ta haci ta cu tur dos banda algo, dor di aumenta su entradanan dor di introduci diferente medida pero di otro banda ta doblega su gastonan dor di tuma hendenan den servicio, dor di duna e minister di infrastructura 20 miyon pa bay haci show cu’ne, dor di duna otro minister 18 miyon pa tambe haci show cu’ne,
dor di bin cu diferente post pa biaha, pa ‘deskundig advies,’ huurmento di edificio tur esakinan ta den e presupuesto.
Bo ta gañando pueblo cu bo ta tumando medida pa paga debe pero di otro banda nan ta aumenta e debe dor di bin cu gastonan extra, tuma gran cantidad di trahado ya cu den e prome 5 luna di e gobierno aki, a tuma mas di 100 persona mas di loke nan a hay’e na final di gobierno di gabinete Mike Eman II.
Kiermen si bo a kita 300 hende for di servicio di gobierno na fin di aña y na comienso di aña bo tin 100 mas compara cu e gobierno anterior, ta nifica cu den apenas di algun luna nan a tuma mas cu 400 hende den servicio di gobierno.
Anto nan kier papia di mega debe, bo kier papia di medidanan ta necesario, pero esaki no ta nada necesario esaki no ta loke pueblo a spera di un gobierno cu a priminti asina hopi.
Bo a bisa cu bo a bay bin cu 7 minister y nos por mira cu tin 8 minister plus uno cu bo no por a nombra pero cu si ta riba ‘payroll’ si, kiermen bo no a baha ningun gasto pa loke ta e promesa cu bo a haci cu ta otro mentira cu pueblo ta wordo confronta cu’ne,” Parlamentario Benny Sevinger ta mustra.