Home » Parlamentario Benny Sevinger Gobierno ta aumenta debe cu ‘friends & family’ y nombramento politico

Parlamentario Benny Sevinger Gobierno ta aumenta debe cu ‘friends & family’ y nombramento politico

by Admin
0 comment 86 views

Gabinete Wever Croes a presenta un presupuesto cu ta liña recta cu loke a wordo priminti na pueblo durante di campaña electoral y Parlamentario Benny Sevinger ta mustra cu lo ta imposibel pa duna aprobacion na un presupuesto cu na luga di baha debe manera priminti, ta subi debe y ta impone medida riba pueblo.
“Un gobierno tipifica pa medida, un gobierno cu ta persigui contrincantenan, manera cu nos a mira den pasado ora cu a bin cu comision di berdad cu Rudy Lampe a wordi institui c’un ‘begroting’ di casi un miyon florin pa persigui contrincantenan politico y awe ta mesun cos.
Awe Rudy Lampe ta sinta banda di un di nan cu el a persigui den pasado cu ta Otmar Oduber, nan dos ta smile hunto, ta bati kelki hunto y bo puntra bo mes ta ki clase di politico nos tin na Aruba, unda un ta persigui bo, yama bo pa ladron y kier a cera bo, y awe boso nan dos ta sinta den conseho di minister ta bati kelki pa persigui otronan, cu tabata para banda di Otmar Oduber ora cu e tabata wordo persigui pa mesun Rudy Lampe aki.
Awe ta persigui huurdonan di kiosconan, trahadonan den tur departamento di gobierno, hendenan humilde ta wordo persigui dor di e gobierno aki, un gobierno di medida, un gobierno di persecucion.
Mientras cu ta papia di debe por mira e proceso di nombramento di ‘friends & family’ caminda ya caba por mira rond di tur minister nan rumannan, tanta y omo, primonan, tur ta den servicio di e ministernan y e ehempel mas grandi ta minister Glenbert Croes cu tur su rumannan, omonan ganando salarionan astronomico y caminda practicamente nan ta dal den otro den edificio di minister.
Ya nos por mira cu despues di apenas a drenta den gobierno, ya caba por a tuma nota di un contract di huurmento di edificio y un di e prome contract a bira di SVB pa bay den edificio di papa na Arulex.
Atrobe mesun gobierno bieu di MEP na poder hunto cu dos partido cu ta mira oportunidad di por atraca e pais y asina gosa di bienestar di nos comunidad.
Pues un presupuesto catagorisa pa tres cos, esta medida, persecucion y nombramento di ‘friends and family’ den servicio den tur departamento di gobierno.
Nos por mira cu POR ta nombra tur su candidatonan tur caminda y nos por a mira esaki na DIP, na kadaster, Serlimar y DTI anto tin di puntra nos mes si ta esaki pueblo tabata warda ariba despues di eleccion.
Nos ta kere cu pueblo ta mira tur loke ta sosode y nos ta kere cu den proximo dianan y na momento cu e medidanan drenta na vigor, nos pueblo lo sa di responde na e gobernantenan aki cu a priminti asina hopi y awe nos ta mira cu nan ta haci lo contrario.
En todo caso e presupuesto aki ta un presupuesto cu no ta carga nos aprobacion ya cu bo no ta bahando bo gastonan, bo no ta bahando bo debenan pero al contrario nos ta mira debenan ta subi y gobierno aki ta simplemente purba tire riba e gobierno anterior.
Nan a bisa cu nan ta bay baha e debe y awe nos a mira cu nan ta haci net lo contrario,” Benny Sevinger, Parlamentario pa fraccion di AVP.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio