Den cuadro di e reunion den parlamento pa tratamento di e ley di presupuesto 2018, naturalmente a bin dilanti tambe e tema di salubridad y su retonan. Hopi biaha por scucha keho for di comunidad riba e sistema di dokter di cas. Tin ainda poco confusion riba e pregunta di ki ora un pashent ta bin na remarke pa verwijsbrief pa specialista como tambe e lista di espera largo pa yega na un specialista. Parlamentario Daphne Lejuez a toca e tema aki y a puntra minister encarga cu Salubridad con lo adresa e acceso na dokter di cas parti merdia.
Beneficio di AruBIG pa pashent
Tambe a toca riba e tema di AruBIG, un ley recientemente reformula por medio di un comision di diferente experto riba tereno di salud. E comision cu a wordo institui ta consisti di diferente experto riba tereno di salud cu tin e tarea pa conseha minister di Salubridad con pa reformula e ley di AruBIG pa por amplia e registracion di BIG. Dunando chens na nos studiantenan cu a completa nan estudio den region, Europa y/of Merca pa por traha den nos sistema di cuido pa asina aporta na un miho calidad di cuido pa nos ciudadanonan. Parlamentario Lejuez a puntra den parlamento pa gobierno duna un splicacion riba kico AruBIG ta y con introduccion di esaki lo por beneficia e pashent.
Independisacion di AZV y servicionan di IMSAN
Den e FEM (Financieel Economisch Memorandum) ta wordo menciona cu lo traha na independisa AZV financieramente cu e meta pa asina reduci e contribucion creciente di gobierno y pa purba haci e servicio mas sostenibel. E parlamentario a pidi gobierno pa duna un elaboracion tambe riba e plannan aki. A compronde cu e proyecto di hospital nobo lo tin retraso y tambe gastonan adicional. Parlamentario Lejuez a pidi minister di Salubridad pa un splicacion di e proceso aki y tambe kico lo wordo haci pa tene e costonan aki bao control. “Ta compronde cu esaki lo bay keda cla awor na 2020, kico tabata e fecha original cu e lo mester wordo entrega? IMSAN tambe lo cuminsa cu un plan di expansion otro siman pa un periodo di 18 luna cu un inversion di 62 miyon florin. Kico ta e servicionan cu por spera na IMSAN despues di e expansion y con e lo yuda na mehora e servicio y alcance na servicio medico”, parlamentario Lejuez a trece dilanti. Tambe a tuma nota cu lo introduci un ‘klachten commissie’, anto e parlamentario a puntra kico e tarea di esaki lo ta, y con esaki lo wordo consulta den caso di un disputa of keho.