ORANJESTAD, Aruba – E fin di siman venidero e mecha di Flip Flop Festival ta cende cu e fiesta di apertura diasabra awor den E-Motions, sigui pa e Pool Party diadomingo na Renaissance y dialuna 30 di April e concierto principal na Bushiri Beach. Awe nos kier comparti algun detaye di dos di e 5 artistanan internacional cu e festival lo tin.
Un di e artistanan cu tin un fanaticada grandi specialmente di e hobennan ta Karol G. Su nomber mes ta Carolina Giraldo Navarro y ta naci na 1991 na Colombia. Su carera a cuminsa durante su participacion den e programa di television X Factor. Despues di a studia na Universidad na Medellin e la bay New York pa sigui cu carera musical. Na 2006 e la cuminsa uza e nomber Karol G. Karol tin un sin fin di exito riba su nomber incluyendo “Pineapple”, “Ahora me Llama” hunto cu Bad Bunny y tambe recientemente un colaboracion musical cu Shaggy yama “Tu Pum Pum”, E exito hunto cu Bad Bunny ta conta cu mas di 500 miyon views riba youtube. Karol G ta hopi contento di lo por ta na Aruba pa asina canta pa su fanaticonan.
E otro artista cu nos ta comparti awe ta e famoso canta-autor di musica reggae esta Alborosie. Alborosie ta naci na Italia y a cuminsa traha musica di reggae. Algun aña despues e la dicidi di muda pa Jamaica. Aki e la cuminsa traha den e studio di legendario Bob Marley. Famia di Marley a mira su potencial y a dicidi di firme como artista. Esaki a pusha su carera den un direccion sumamente positivo y global. Alborosie hunto cu su banda ta duna concierto rond mundo durante henter aña y den luna di April e tabata tin varios presentacion na Mexico. E luna lo termina cu su presentacion na Aruba. Algun di su exitonan di mas popular ta “Herbalist” y “Kingston Town”. Esakinan sigur y otronan lo bay resona canto di lama durante e festival. Alborosie lo ta un di e prome atraccionnan internacional cu lo ta riba e escenario. Pa e motibo aki ta corda tur persona pa por ta trempan na e festival.
Portanan di e festival riba dialuna dia 30 di April lo habri pa 6 or di atardi. Nos bandanan local manera Tsunami y Le Groove tambe lo ta formando parti di e atraccionnan musical.
Ainda tin carchinan general (Awg 85,- ), vip weekend pass y mesa disponibel. Pa loke ta e Week End VIP pass esaki ta dunabo acceso durante e concierto pa e area di Standing VIP cu ta ubica net dilanti e stage y acceso na e fiesta di apertura y e pool party na Renaisance. E prijs pa e seccion aki actualmente ta na benta pa Awg. 125,- y lo subi pronto.
Pa loke ta e Mesanan di VIP esakinan tambe ta duna acceso na tur tres anochi di e festival y durante e anochi di concierto lo ta riba un plataforma halto pa un tremendo bista. Pa VIP por yama : 735-1507.
E carchinan ta obtenibel na Citgo Palm Beach, Citgo Boulevard, Citgo Santa Cruz y Citgo Essoville.
E otro Artistanan confirma: Fat Joe, Karol G, Beenie man, Jeon and Special Guest, Natty Rico, Freddy Moreira y mas.
Flip Flop Festival is Powered by Chill Beer, Digicel, JDB Agency and Elite Productions & Entertainment.