Parlamentaria Marisol Lopez-Tromp Integridad mester conta tambe pa tur esnan den puesto importante, incluyendo esnan na bureau di ministernan

Parlamentaria Marisol Lopez-Tromp durante tratamento di presupuesto den Parlamento a dirigi un pregunta pa tur minister relaciona cu nombracion di personal.
El a indica cu ultimamente tabatin hopi discusion den publicidad riba nombracionnan. Ora cu e tipo di discusionnan aki ta bin tin di haber cu con e procedura of nombramento a bay, pero tambe tin biaha pa e escogencia di un persona pa e funcion.
Teniendo na cuenta esaki, lider di fraccion di POR a puntra con e proceduranan ta pa e nombracionnan. E ta supone cu mayoria ta pasa via Conseho di Minister, aunke Minister di Enseñansa ta e unico cu por nombra personan sin pasa via Conseho di Minister debi na e importancia di e cartera y specialmlente pa e parti di maestronan no por bay depende cu kisas algo ta keda tranca.
E ta bisa cu cada minister actual a pasa den un screening pisa unda a coba den tur lachi y tur buraco pa wak si ta pase. Mirando loke a pasa unda un ex minister di Asuntonan Social y di Hubentud a haya su mes den e situacion cu a wordo deteni y hasta a bay cera, cual ta algo grave pa nos pais, e echo ta algo cu ta hinca Parlamento den un berguensa grandi y ta atacha e politiconan.
Pesey Marisol Lopez-Tromp ta puntra cu si mescos cu e screeningnan di integridad y pa ta ministeriabel cu cada un di e actual ministernan a pasa, con huicioso y con hopi cada minister ta tene esaki na cuenta ora di nombra personal no solamente na nan bureau, pero tambe den puestonan importante pa Pais Aruba. No ta solamente si un persona tin un diploma, si e ta cumpli cu cierto rekisitonan, pasobra awendia ta importante tambe pa e persona aki ta cumpli cu e parti di integridad.
Na Parlamento tin un iniciativa nobo pa loke ta integridad, pasobra den pasado tabatin otro cu no a conta cu sosten di e actual parlamentaria di POR. E ley tabata bon, pero gobierno anterior a hinca algun articulo den dje pa sostene pa e minister sospechoso por a keda den su funcion y hasta a hinca algun articulo den wetboek van strafrecht cu e por wordo libra di esakinan.
Lopez-Tromp a expresa e importancia pa cada minister di tin hendenan rond di nan cu tambe ta cumpli cu e exigencianan cu e ministernan a pasa aden, pasobra ta imposibel pa kere cu casi full un bureau di ex minister ta wordo investiga, cu casi full un bureau di un ex minister a wordo deteni y interoga. Esey kiermen cu esnan cu supuestamente mester a duna e ex minister conseho , no tabatin e capacidad of curashi pa duna e minister un conseho cu ta tene y mantene den e bon caminda. “Nos no ta tuma personanan na nos bureau pa ta ja-knikker. Nos no ta tuma profesionalnan na nos bureau pa nan apoyanos cu un pom-pom. Nos ta tumanan pa nan percura pa hunto cu nos pa nos maneho como gobierno wordo uirgevoerd, pa acuerdo di gobernacion wordo cumpli cune, pero muy en particular, pa cuida, yuda y conseha e minister pa e cumpli tambe cu nos leynan cu nos tin na nos pais”.
E ta agrega cu e ta confia cu nos gobernantenan ta conciente di esaki y for di Parlamento lo vigila tur dia si esaki ta wordo cumpli cune pasobra no kier pa bolbe pasa loke a pasa cu e ex minister di Asuntonan Social y cu loke lo por bay pasa cu ex minister di Infrastructura.