ORANJESTAD: E siman aki ta un siman hopi crucial pa Gabinete Wever-Croes, e siman cu den Parlamento di Aruba ta bay cuminsa trata e presupuesto di aña 2018. E prome presupuesto di Gabinete Wever-Croes, cual ta un presupuesto cu mester a wordo entrega caba dia 1 di September 2017, prome cu e gabinete aki a drenta gobernacion.
Sinembargo segun Prome Minister Evelyn Wever-Croes, e no a wordo entrega, pero si a laga un draft atras, prepara abase di compromisonan haci door di Gobierno anterior cu ta mara e Gobierno aki, den cual tin un deficit di 276 miyon florin. “Mesora e gobierno aki a cuminsa traha, pasobra cu un deficit asina grandi, no lo por entreg’e asina na Parlamento”.
E mandatario prinicipal di nos pais a duna di conoce cu Gobierno a cuminsa weita di biaha na unda lo por baha gasto den un tempo cortico, a bay wak kico lo por haci y asina a presenta e plan financiero cu e ahustenan, cu e crisisheffing, cu e compensacionnan pa nos pensionadonan y pa esnan cu ta gana menos di 2500 florin pa luna cu ta e aumento di reparatietoeslag, asina e Gabinete aki a logra baha e deficit di 276 miyon, na 191 miyon florin.
Sinembargo despues di e conseho di CAFT, cu a bisa cu esaki berdad ta hopi bon, e ta e prome paso significativo, e ta un presupuesto realistico, pero no ta suficiente y nan a pidi Gobierno pa sinta riba un suma di deficit mas chikito cu aña pasa.
Asina Gobierno a yega cu un nota di cambio, cu a laga e presupuesto yega na un deficit di 149 miyon florin. Gobierno a haya un deficit di 276 miyon y a baha e deficit te na 149 miyon, tumando e pasonan aki cu ta refleha 127 miyon cu Gobierno a logra haya otro caminda. Cu esaki Gobierno ta keda bou di e presupuesto di aña pasa cu tabata 155 miyon florin y pues Gobierno ta den cumplimento cu e e reglanan di CAFT.
“E motibo pakico e presupuesto aki ta asina dificil pa traha cu ne y un reto asina grandi ta, cu e pagonan di e proyectonan di PPP cu mester bay wordo haci como pais Aruba, ta yega na su maximo otro aña, 80 miyon cada aña. 80 miyon cu ta bin acerca, esaki ta pone un peso hopi grandi riba e presupuesto” Prome Minister Evelyn Wever-Croes a duna di conoce.