Home » MEP ta felicita Gabinete Wever-Croes pa e curashi di percura pa Fitch mantene nos Credit Rating

MEP ta felicita Gabinete Wever-Croes pa e curashi di percura pa Fitch mantene nos Credit Rating

by Admin
0 comment 73 views

Partido MEP a tuma nota di e hecho cu Aruba ta mantene e status di inversion di Fitch Ratings, pues cu e Credit Rating (grado di credibilidad financiero) a keda na BBB-. Sin duda cu esaki ta un noticia sumamente positivo pa nos pais, ya cu debi na e maneho financiero desastroso cu deficitnan acumula cu a yega te na 2.1 biyon florin, un debe nacional cu a yega na 93% di GDP y un maneho economico negativo hiba pa Gabinete Eman durante 2010-2017, tabata tin mas cu suficiente motibo pa e biaha aki Fitch Ratings bolbe downgrade nos pais, cual lo tabata funesto pa nos desaroyo financiero economico.

Viahe pa New York
Pero danki na e curashi y determinacion di nos Minister di Finansa sra. Xiomara Ruiz Maduro kende den e prome simannan caba di e gobernacion actual a viaha bay te New York USA pa den un forma pro-activo y constructivo delibera cu e companianan di ratings manera Fitch y Standard & Poor’s, poniendo nan na altura di e situacion financiero caotico y desastroso cu el a hereda como minister. Alavez el a mustra nan su compromiso cu e gobierno actual si lo sa di saca Aruba for di e abismo financiero cu e ta aden door di traha presupuestonan riba un base realistico y den forma sostenibel. Sin duda cu tur esaki a conduci cu Fitch Ratings a mustra su confiansa den Gabinete Wever-Croes y a mantene e Credit Rating di nos pais na BBB-.

Ratingnan positivo, 2001-2009
Mester recorda pueblo si riba e hecho cu durante e gobernacion di MEP di 2001-2009, nos pais a conoce Credit Ratingnan hopi positivo for di tanto Fitch, Standard & Poor’s y IMF. No mester lubida cu e gobierno di MEP a hiba un maneho dinamico cu a conduci cu nos tabata tin crecementonan economico sumamente positivo, manera por ehempel na 2008 caminda a registra un GDP cu a yega te na 4.9 biyon florin, un record desde Status Aparte cu te ainda no a wordo surpasa. Tambe nos debe nacional e tempo ey a keda den e margen di 49% di nos GDP. Tur e desaroyonan positivo aki a conduci cu den e rapport di Fitch di 14 oktober 2008 nos pais a logra un Credit Rating di BBB, un Country Ceiling di A- y un Rating Outlook Stable. No solamente Fitch a duna gobierno di MEP un resultado positivo, pero tambe Standard & Poor’s cu den su rapport di 20 di april 2009 a duna Aruba un Credit Rating A- y un Rating Outlook Stable. Pues Gabinete Oduber a bandona gobernacion na 2009 lagando nos pais den un situacion hopi sano atras.

Downgrading Credit Rating na 2014
Sinembargo tabata Gabinete Mike Eman den apenas algun aña a cambia henter e panorama positivo aki. Asina ta cu debi na nan maneho financiero economico desastroso cu a conduci na un Aanwijzing, KB y institucion di CAFT, nos pais a conoce un downgrading na 2014. Fitch Ratings na juli 2014 a downgrade e Credit Rating cu tabata BBB na BBB- y e Country Ceiling cu bao di MEP tabata A-, esaki a baha te na BBB. Mester remarca cu e aña anterior, esta na juni 2013 ya Standard & Poor’s tambe a downgrade Aruba di A- pa BBB+.
Pues ta un desaster mes Gabinete Eman a haci cu nos Credit Ratingnan positivo laga atras pa MEP na 2009. Esaki ta demostra un biaha mas cu nunca AVP tabatin sentimento patriotico pa e pueblo aki y cu no ta importa nan cu nos pais ta wordo downgraded, basta cu nan por sigui endeuda e pais aki y sigui haci negoshi cu patrimonio di pueblo.
Partido MEP ta felicita Gabinete Wever- Croes pa tur empeño haci pa logra toch di mantene nos Credit Rating na BBB-, cual ta muestra di un gobernacion di curashi y determinacion.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio