Parlamentario Arthur Dowers Minister Oduber awor ta pretende cu shete aña largo e tabata un ‘cheerleader’

Ora cu scucha Minister Otmar Oduber bay defende e ‘crisisheffing’ cu su gobierno ta bay introduci na luna di juli proximo, ta keda confirma cu realmente e tin hopi experiencia como lider den carnaval, Parlamentario Arhtur Dowers ta declara.
“Pueblo a keda babuca cu scucha con minister Oduber tin e pudor di bay defende e decision di su Prome Minister pa bin cu aumeno diBBO y BAZV, bisando cu e ‘crisisheffing’ ta pa por atende cu gastonan ocasiona dor di gobierno anterior.
Increibel cu minister scorpion por bin dilanti esaki cu su cara di palo, sin e menor berguensa caminda den e proceso aki e ta punta dede riba su mes ya cu pa 7 aña largo, minister oduber pa forma parti di Gabinete MIke Eman I y II.
Dos periodo di gobernacion di AVP caminda nunca pero nunca a tuma medida contra pueblo di e forma aki pero awor cu e scorpion a haya sanger geel den su adernan, el a cambia y ta yuda MEP haci loke semper MEP a haci, esta castiga pueblo den su cartera.
Minister Oduber ta lubida por completo su participacion na grandi den e maneho cu a ser hiba pa gabinetenan Mike Eman, y awor ta trata di laba no solamente su mannan, pero henter su curpa.
Tur hende por corda con el a para na cantidad di proyecto di gabinete Mike Eman, di su ministerio y di otro ministerionan, pa mustra pueblo kico gobierno di AVP a haci cu su placa, invirtiendo den e pais den su barionan, pa awor e bruheria geel a gara su mente y ta pone papia den un tono totalmente geel.
Ta tristo ora c’un politico cu mester por sa miho, ta permiti su mes wordo uza pa castiga pueblo den e forma cu gabinete Wever Croes ta haciendo aworaki sin cu e ta lanta y defende interes di pueblo, ya cu su propio interes y di su sponsornan, ta bin prome cu pueblo.
Mas cu 20 aña minister scorpion a wordo forma pa e vision di AVP, pa 4 aña largo el a forma parti di fraccion di AVP den Parlamento y 7 aña largo el a fungi como minister di gabinete Mike Eman I y II pa awor bin pretende cu e no sa di nada, cu e no a forma parti di e maneho cu a wordo hiba.
Aki ta lanta e pregunta si minister Oduber a mira si mes den e dos gobiernonan di AVP mas tanto como un ‘cheerleader’ y no como minister ya cu ta e unico forma cu e por splica e wega falso cu e ta hungando pa dos luna caba,” Parlamentario Arthur Dowers a splica.