Exprodesk conhuntamente cu Defiant Concepts ta organisa un tayer di dos dia cu e topico ‘Raise your Digital IQ’

ORANJESTAD – Departamento di Asuntonan Economico, Comercio y Industria (DEZHI) y su unidad Exprodesk, conhuntamente cu Defiant Concepts ta organisa un tayer di dos dia, cu lo tuma luga riba dianan 19 y 20 di april 2018, for di 9’or di mainta te cu 12’or di merdia. E tayer ta trata e topico ‘Raising your Digital IQ’.
DEZHI su unidad Exprodesk ta organisa e tayer aki cu e meta pa brinda nos empresarionan e conocemento concreto, y practico riba e tereno digital pa asina aumenta e oportunidad di crecemento di nan negoshi. Na final, tur participante lo ricibi un certificado di asistencia pa e dos dianan di training.
Sr.Bruce Harms di Defiant Concepts, lo ta presenta e tayer ‘Raising your Digital IQ’.Sr. Harms tin hopi aña di experiencia den e sector di marketing y dunamento di tayernan na Aruba na diferente tipo di instancia. Nos ta spera cu e participantenan lo por beneficia y siña un poco mas con pa uza medionan digital pa promove nan mes den mercado local y internacional.
DEZHI y su unidad Exprodesk ta invita tur interesado pa join nos den e tayer aki cu lo tuma luga na Departamento di Asuntonan Economico, Comercio, y Industria, cu ta situa na L.G Smith Boulevard #160, na edificio di Sun Plaza, riba segundo piso. E tayer aki ta completamente gratis, pero e espacio ta limita. Pa e motibo aki nos ta pidi e participantenan pa haci nan registracion na tempo. Pa registra por mail nos na [email protected]. Pa mas informacion por bishita nos website www.exprodesk.com of nos facebook page www.facebook.com/exprodesk.