Den su racha di mentira y manipulacion di e ultimo simannan aki, Mike Eman no por a laga su mal maña di tira culpa riba MEP pa locual ta e aumento drastico di nos debe nacional. Un biaha mas e kier bende y laga pueblo kere cu MEP ta mes of te hasta mas culpabel pa loke ta e creacion di e Megadebe, lubidando cu tabata danki na e aumento explosivo di nos debe nacional durante e ultimo 8 añanan, su gobierno di AVP pa prome biaha den historia desde Status Aparte a haya un Aanwijzing, KB y Supervision Financiero di CAFT na 2014.
AVP, autor di 70% di debe nacional
Ta p’esey partido MEP ta haya su mes obliga di un biaha mas desbarata e mentira di Mike Eman door di analisa con e debenan total di pais Aruba a desaroya desde 1986 te cu 2017 bao di e diferente gobiernonan di AVP y MEP, esta e Gabinetenan Eman y Gabinetenan Oduber. Den e tabel adhunto nos por mira cu di e total di 4195 miyon florin na debe, 2918 miyon florin (70%) ta pa cuenta di e gobiernonan di AVP y 1277 miyon florin (30%) pa e gobiernonan di MEP. E cifranan aki ta compila di cifranan oficial di Banco Central, pues cu esaki Mike Eman no por sigui cu su mentira y manipulacion venenando mente di pueblo cu gran parti di e debe nacional a ser ocasiona pa MEP. Berguensa pa Aruba tabatin un Minister President asina mentiroso!
Autor di 2 biyon di debe PPP
Pero fuera di e debe nacional aki di 4195 miyon florin, no mester lubida e debenan ‘off balance’, cu tin cu wordo paga den e proximo 25 pa 29 añanan pa locual ta e proyectonan PPP (Green Corridor, Watty Vos Blvd, Hospital y e MFA-nan), cu den total ta suma na un otro 2 Biyon florin extra na debe. Pues e debenan di PPP hunto cu e parti di e debe nacional cu AVP a ocaciona di 2918 miyon florin (3 Biyon florin), nan a crea den total un debe di 5 Biyon florin desde entrada di Status Aparte te cu 2017. Anto tur dia e destructornan aki ta grita y kier pretende cu nan a haci un tremendo trabao riba tereno di finansa publico.
Ta p’esey no ta pornada cu partido MEP ta insisti y diariamente ta keda recorda pueblo cu e desaster y ruina financiero di nos pais tin un nomber y fam: Mike Eman y AVP.