Palm Beach – Diasabra den careda di 2’or di marduga, patruya di districto di Noord a wordo informa cu tin un problema na Gusto.
E problema tawata cu e bouncernan di Gusto a saca dos homber turista for di e establecimento, mirando cu nan lo tawata haciendo hopi problema den e lugar. E turistanan tabata bou influencia di alcohol y posiblemente tambe droga.
Despues di un rato, a pidi e polisnan pa yega cu mas urgencia, paso e dos hombernan aki tabata hopi agresivo. Na yegada di e prome patruya, e bouncernan di Gusto a mustra polis unda un di e turistanan ta y a informanan cu un tabata bisti cu tshirt cora tabata paden y e otro bisti cu un tshirt blanco, a core bay direccion nort, den algun minuut un agente a sali cu e homber bisti na cora geboei.
Na e sitio un taxista a acerca polis y a bisa polis cu nan (e dos turistanan) lo a causa daño na su auto tambe na e parti patras, pero e no por a warda e ora ey, paso e tabata tin otro turista den auto pa hiba hotel.
Segun nos a compronde, pero no por a confirma e momento eynan, cu e turistanan aki a agredi un otro taxista tambe.
Problema a start
Momento cu e agente a bay pa hinke den e patruya y asina warda pa transportwagen bin buske. Normalmente esaki lo a bay sin problema, pero e biaha aki e homber a cuminsa haci hopi fastioso y a cuminsa na resisti.
Un cantidad di palabranan insolente y falta di respet e agente policial mester a wanta di e turista, pero asina mes e agente keda hopi calmo y cu hopi pasenshi.
Despues di un rato cos a bay full for di man y e agente mester a bay tera cu e homber pa por a domine. Un otro homber turista a core bin yuda e agente, wantando e homber agresivo abou mientras refuerso tawata yegando.
Un poco mas panort, esun na blanco lo tawata resistiendo cu e otro colega polis, pero e agente a sa di pone asina mes den boei y a logra trece pazuid unda e borchi di I Love Aruba ta.
Transportwagen di polis a yega y mesora a hincanan den transportwagen. Na momento cu tabata hincandonan den e transportwagen, un biaha mas esun cu tshirt cora tawata falta e agentenan respet, cu cantidad di palabra malo tanto na Spaño como na Ingles.
Polis a bise cu e mester respeta nos leynan, pero asina mes a papia hopi palabra malo.
Ambos a wordo transporta pa warda di polis na Shaba.