Recientemente, lider di fraccion di MEP, sr. Rocco Tjon MBA, a tuma nota cu Cuerpo Policial a wordo ekipa cu 8 vehiculo pa e departamento di trafico. Tambe a haya informacion cu 22 vehiculo lo wordo adkeri pa e departamento di “Algemene Politie Diensten”.
Na prome lugar e ta importante cu Cuerpo Policial nan “wagenpark” ta wordo reemplaza, pasobra esaki lo eleva nan mesun seguridad den trafico. E discusion entre e mandatario actual y e ex-mandatario, kende lo a percura pa e vehiculonan aki ta uno ridiculo. Vehiculonan semper lo wordo reemplaza despues di tanto tempo, pasobra contractnan ta vence. Tambe por tuma como ehempel e “dual-factor theory” den cual ta splica cu material basico pa haci trabou, manera un auto di polis pa Cuerpo Policial, no lo eleva satisfaccion di e trahadornan, e ta solamente percura pa nan no demotiva (Herzberg,1964).
E discusion mester bay riba e puntonan cu si e vehiculonan aki di berdad lo percura pa e polisnan por haci nan trabou mihor, cu mas seguridad y na final di dia si e ta contribui na brinda un mihor servicio pa pueblo. Personalmente, ta lamenta cu e vehiculonan no ta ekipa cu technologia, technologia comun den diferente Cuerpo Policial rond mundo, cu ta haci’e posibel pa polisnan por traha y print rapportnan standardisa mes ora. Tambe atravez di e technologia aki, for di den e sistema ancra den e vehiculo e polis lo por haña informacion mes ora atravez di un computer. Technologia asina lo haci e trabou mas safe y lo haci’e posibel pa por brinda un mihor servicio na pueblo.
Nos tin entendi cu den e “bestek” di e 22 vehiculonan cu ta na caminda, escohi door di e mandatario actual of esun anterior, tampoco a tene cuenta cu e aspecto aki. Esaki ta di lamenta. Durante campaña e punto aki a wordo treci pa dilanti y riba mi facebook page por wak e idea aki den e clip titula “Innovacion y Technologia”.
Pronto lo trata presupuesto y como fraccion di MEP nos lo entrega un mocion den cual lo urgi gobierno pa por lo menos un vehiculo di “Algemene Politie Diensten”, den cada districto wordo ekipa cu e technologia aki, pa asina por combati criminalidad mas eficiente, eleva e seguridad di nos coleganan polis y eleva e servicio pa comunidad.