ORANJESTAD – Mucha ta biba den diferente tipo di constelacion familiar y e famia Arubano ya no ta caracterisa pa e constelacion di famia tradicional di 2 mayor. Segun Sue-Ann Ras, parlamentario pa partido MEP, tin un crecemento di cantidad di hende cu ta opta pa keda soltero (nunca a casa), un aumento grandi den hende cu ta asumi e responsabilidad di mayor soltero y aumento barbaro di divorcio. Indudablemente mester tin un cambio den e forma di biba di nos muchanan. “Pero tambe tin poco conocemento y conscientisacion riba e impacto di termino largo di e transicionnan di bida aki riba e mayornan y e yiunan”, e parlamentario ta sigui bisa.
PREVENTIVO
Pa por traha preventivo, segun Ras, mester di dato, pa cual e parlamentario a acerca Centraal Bureau Statistiek (CBS), cu a coopera hopi bon, pa dun’e tur informacion cu e por uza. Entre e documentonan ricibi, tabata e documento “Profile of Aruba Childrens”, unda cu ta descubri hopi di e problemanan riba cual por traha y ataca, cu ta escalando rapidamente y ta visibel den nos comunidad. “Na momento cu analisa detayadamente e documento aki, por yega na hopi conclusion, comprension y bista riba nos problemanan social. Traha un plan preventivo mester ta funcional y mester por duna un resultado realistico, tanto riba termino cortico como esun largo”, Ras a sigui bisa. Actualmente Aruba ta den e situacion critico, unda cu nos mester cuminsa drecha loke tin caba y na mesun momento traha riba plan di accion preventivo, pa e situacionnan y crisis social no sigui escala. Segun Ras, CBS por a demostra statisticamente e reduccion drastico y continuo di constelacion familiar di dos mayor y e aumento barbaro di e famianan di mayor soltero, specificamente mama soltero.
MAMA SOLTERO
Ras ta mustra cu si mira e constelacion familiar di 2010, e categoria di mama soltero ta resalta. E cantidad di famia cu mucha di 0-7 aña na 2010, tabata di 15.256 famia. “Loke cu ta alarmante y cu nan ta señala tambe ta, cu e pareha cu mucha ta 7.489, mientras cu e parti di mama soltera ta 7.253. Kiermen cu practicamente nos constelacion di populacion ta consisti di mes hopi mama soltero como esun di pareha. Esaki ta un crecemento hopi grandi mes y rapido den e ultimo 3 decadanan, unda cu antes e mamanan tabatin e funcion di keda cas, cuida y educa e muchanan, mientras e tatanan tabata traha y percura pa tur loke ta e parti financiero. Mas cu claro, e constelacion di mama soltero, ta exigi hopi responsabilidad, energia y reto”, Ras a indica.
PRESION Y RETO
No por descarta tampoco, segun Ras, cu alrededor di 75% di e mamanan soltero aki, ta traha den sector hotelero y restaurant, unda cu e particion di tempo, entrada y flexibilidad den orario di trabou ta masha limita. Mas tristo ta, cu mayoria di e mamanan soltero aki ta cay net bou di e entrada di nivel di subsistencia, cu ta Awg. 2.400 pa un famia consistiendo di 1 mama y 1 yiu. “E retonan cu e mamanan aki ta enfrenta ta enorme y nos tin cu bin cu plan y accion pa por brinda nan cierto sosten”, Ras a finalisa bisando.