ORANJESTAD, Aruba – 5 di April 2018: Diadomingo den oranan di mainta y atardi Riu Palace Aruba a tene actividad di Easter Egg hunt cu huespednan. Tanto e muchanan como e adultonan a disfruta di e dia buscando e webonan cu e empleadonan di Riu Activities a sconde.
Den oranan di mainta mas o menos 90 mucha a participa den e actividad di Easter Egg hunt, cual actividad a tuma luga banda di e pool na Riu Palace Aruba. E muchanan a disfruta di e presencia di e Easter Bunny, kende a celebra e mainta aki hunto cu e muchanan. E muchanan a gana diferente premio y a pasa busca esakinan na Riu Land na final di e actividad.
E muchanan a disfruta y tabata contento, unda e mayornan por a mira e sonrisa y felicidad riba e caranan di cada mucha. E muchanan tabata core ariba bou rond di e pool pa asina por a haya webo y gana premio.
E actividad a sigui den oranan di atardi unda cu e adultonan tambe a participa den e Easter Egg hunt y pasa un rato agradabel. E team dinamico di Riu Activities a sconde 5 webo rond di e area di pool y tabata bisa “riddle” pa asina e turistanan mester a rei unda e webonan tabata scondi.
E empleadonan di Riu Activities a sconde e webonan den diferente caminda manera bar, spa, blue wagon di serbete, Riu Land. Tambe a sconde un webo den un blaas cu un di e empleadonan mas hoben di Riu Activities tabatin bisti. Premionan cu e turistanan a gana tabata 2 Boter di Champagne, 1 gift certificate di Submarin di De Palm Tours, 1 gift certificate di Sunset Sail ariba catamaran di De Palm Tours y un gift certificate di Renova Spa na Riu Palace Aruba mes.
Riu Palace Aruba ta gradici tur hende cu a participa y cu nan a pasa un momento agradabel durante e Easter Egg hunt.
Riu Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.