Ayera mainta nos por a sigui conferencia di prensa di gobierno riba medionan social. Ministro Presidente Sra. Evelyn Wever Croes a haci anuncio oficial den nomber di Coalicion alrespecto e maneho di gobierno pa locual ta regarda aña 2018. Despues di a hereda un pais na rand di bancarota, november ultimo mester a haci ehercicionnan sobre humano. Un pais cu un debe nacional di 93% di GDP. Esaki kiermen cu di cada florin cu drenta caha di gobierno, 93 cent ta comprometi pa paga debe y 7 cent ta resta pa rond e pais. Un Aruba cu un crecemento economico negativo desde 2015. Un pais stagna. Un Aruba cu un desempleo halto y un criminalidad fuera di control. Un Aruba sin control di prijs di comestibel y un situacion social devastador. Un Aruba cu a wordo horca door di e gobierno anterior cu proyectonan PPP. Proyectonan PPP cu lo costa pueblo 81 Miyon pa e proximo 20 añanan y no tabata presupuesta ningun caminda door di e gobierno anterior.
Crisisheffing temporal
Bao di e gobierno actual ta haciendo tur locual mester ser haci y a corta gastonan den tur ministerio. Na coordinadornan, den comparacion cu gobierno anterior, lo spaar 28 Miyon florin. A manda carta pa tur e companianan estatal manera RDA, Utilities, ATA, SETAR y tambe departamento di gobierno pa austeridad y hala faha mara pa asina nos por pasa hunto den un tempo dificil cu e gobierno anterior a ocasiona. Ministro Presidente a anuncia cu lo bin cu un crisis heffing di 2.5 % reparti den 1.5 % pa paga proyectonan PPP y 1% pa BAZV. Esaki ta temporal y lo structura AZV y den 2019 lo trece e cambionan necesario. Pa alivia y mitiga e peso riba pueblo lo amplia e canasta basico lo maximo posibel. Lo pone mediante un ley e lista di tur producto cu ta cay den canasta basico banda di cash register na tur lugar. Lo institui un “Swot Team” cu autoridad pa duna boet y lo controla tur supermercado y mini marketnan unda prijsnan cu gobierno stipula pa consumidor riba productonan di alimentacion no por varia di prijs na ningun supermercado sino lo haya un boet pisa.
Compensacionnan
Locual ta nos pensionadonan lo reduci e AZV di 10.5% pa 6.5%. Den mesun plan lo construi minimo 200 cas pa aña. Pa esnan cu minimumloon lo aumenta e reparatietoeslag. Asina trece den balansa e poder di compra versus e crisis heffing aki. Ta tuma un gobierno hopi curashi pa tuma decisionnan pa evita un KB cu posiblemente nan lo a haya basa riba e situacion hereda y na e mesun momento crea e speransa poniendo economia draai creando trabou y prosperidad den corto tempo bek pa Pais Aruba. Ta pidi pueblo e comprension necesario pa cruza e brug aki hunto pa garantisa felicidad di nos yiunan den futuro. Un Aruba den transformacion.