Durante rueda di prensa di e siman aki mi a reacciona riba diferente ponencia di parlamentario Richard Arends pa loke ta trata finansas publico y minister di Finansas y Economia.
Den medionan di comunicacion skirbi Richard Arends ta remarca cu den e coalicion actual e spirito di ‘lora manga y traha’ ta completamente ausente. Ariba e punto aki un biaha mas mi mester constata cu e significacion cu sr. Arends ta duna e frase aki no ta cuadra cu esun di mi. Sr. Arends ta presenta conclusionnan politico beneficioso y kier window dress e realidad, indicando un biaha mas cu e ta sali di e punto di salida cu nos pueblo no ta consciente di e situacion real y desaster financiero cu nan a laga Aruba aden.
Lora manga y traha a la estilo di AVP y su lider Mike Eman nos tur por! Nos tur por corda con sr. Arends su lider di partido den pasado na mas di un ocasion a lora manga pa bay chapi na un cas bandona, pa verf un pida palo aki aya, hasta a lora manga pa yuda basha fundeshi y e ehempel mas importante ta dia el a kita bachi, lora manga y bay sinta bou tent dilanti Kabinet di Gobernador cu welga di hamber y pa busca guera cu Hulanda. Si ta na esaki sr. Arends ta referi, enberdad e espirito di ‘lora manga y traha’ aki ta ausente den e gobierno actual y sigur den e 4 añanan nos dilanti e lo no experencia.
Nos Minister di Finansas enberdad ta bisti shimis y saya, pero mi por garantisa pueblo cu desde cu el a asumi su responsabilidad e tin su ‘carson bon bisti y bon faha’ y su manga di camisa ta constantemente lora. E ta traha di dia y anochi pa logra cu Aruba ta haya su credibilidad financiero bek, cu nos ta incia e proceso pa sanea nos fiansas publico na un manera responsabel y duradero y ta haciendo su maximo esfuerso pa crea un balansa entre drecha nos situacion financiero y percura pa esnan mas vulnerabel por mantene un bida digno.
Pa realisa e metanan riba tereno financiero y resolve e desaster financiero cu nos a hereda ta rekeri curashi y determinacion, algo cu sigur den e gobierno saliente, na cual sr. Arends a forma parti di dje, tabata completamente ausente.
Sr. Arends mester stop di purba tapa solo cu un dede y sigur mester realisa cu e no por sigui tira santo den wowo di pueblo. E sa bon bon con nan a laga nos Pais atras.