Durante conferncia di prensa semanal di Fraccion di MEP, Parlamentario Setty Christiaans-Yarzagaray a elabora riba un carta recien cu a sali for di Staatssecretaris di Asuntonan Interno y Relacionnan di Reino di Hulanda sr. Raymond Knops. E Parlamentario ta indica cu e documento aki a sali riba medionan social prome cu a yega Parlamento di Aruba of gobierno mes y ta haya esaki jammer cu documentonan asina importante ta sali asina.
Den e documento claramente por ripara cu ta indica cu Aruba den un principio mester a cumpli for di aña 2017 cu e ley di LAFT na unda ta para cu finansas gubernamental sano no a wordo logra na aña 2017 y 2018. Parlamentario Christiaans-Yarzagaray ta kere cu esaki lo no a wordo logra tampoco na 2016 cua despues cu nan tin tur e documentonan y bay bek den 2016 cu revisionnan lo prueba cu e Gobierno anterior no a logra e norma di LAFT den e aña aki tampoco.
Segun e Parlamentario, Aruba mester tawata tin un norma di deficit na 2017 di 0.5% di nos GDP, dus di nos ingreso total di pais Aruba. Na final di 2017 por a wak cu esaki a resulta den un 3.1% di GDP. Pesey Gobierno actual ta pone tur cos manera mester ta riba mesa y ta presenta informacion realistico tambe pa aña 2018.
Pa e aña aki segun e ley mester a bin cu un surplus di 0.5% di GDP (pues di e ingreso total di pais Aruba). Te na unda Parlamento a wordo informa, Gobierno ta bay presenta esaki na un 3.9% mirando cu awor si Gobierno lo engrega presupuestonan den un concepto realistico y no fabrica cu cifranan ficticio of manipula manera tawata e caso cu e Gobierno anterior. Esaki tawata un di e problemanan grandi cu a hiba nos na e debe di pais Aruba yegando na 91% na 2018.
Parlamentario Christiaans-Yarzagaray a splica cu e declaracion di Staatssecretaris Knops no tawata un sorpresa na prome instante pasobra tin diferente puntonan den e ley cu ya e Gobierno anterior no a atene su mes na nan y cu ta motibonan pa haya un ‘aanwijzing’.
E prome ehempel di esaki ta cu Gobierno anterior no a entrega e presupuesto 2018 na september 2017 segun ley di LAFT. Esaki tawata un motibo caba pa e Gobierno anterior haya un “aanwijzing’.
E di dos ehempel na unda Gobierno di AVP no a atene na puntonan den e ley ta cu na aña 2017 no a cumpli cu e normanan stipula den e mesun ley aki di 0.5% di e deficit mirando cu esaki a resulta di ta 3.1%. Esaki ta e di dos motibo cu por a haya un ‘aanwijzing’.
E di tres ehempel ta paso ‘concept begroting’ di 2018 tambe ta duna un grado di deficiet hopi mas halto cu e norma stipula den LAFT cu ta motibo pa e di tres motibo pa un ‘aanwijzing’ pa e gobierno anterior di AVP.
Mester tene na cuenta tambe cu gobernacion ta un continuacion. No obstante cu Gobierno tin otro signatura awe y di ki color cu ta, lo no haci diferencia paso e gobierno n’e momento aki mester cumpli cu ley y exigencianan stipula durante gobernacion anterior. Aunke por bisa si cu si acaso mester haya aanwijzing esaki lo refleha riba e mal maneho di e gobierno di AVP.
Parlamentario Christiaans-Yarzagaray ta lamenta cu den medionan di comunicacion mas bien liga na oposicion ta bin cu show bisando cu Aruba tin riesgo pa haya un ‘aanwijzing’ siendo cu ta di hopi tempo caba ya nos tawata den riesgo di haya no uno, sino tres ‘aanwijzing’.
E Parlamentario di Fraccion di MEP a bisa cu apesar cu e declaracion di Staatssecretaris di Reino no tawata un sorpresa, e ta toch un desapunto pasobra
Gobierno di Aruba actual tawata den combersacion cu Gobierno di Hulanda y tambe cu Staatssecretaris pa mustra cu Gobierno actual ta trahando cu tur seriedad y dunando tur informacion corecto awo si, contrario di e Gobierno anterior cu a entrega informacionnan cu tawata desvia di informacion corecto.
“Awo cu Gobierno di Aruba ta pone un imagen realistico, ta haya un mensahe asina cu di un banda no ta un sorpresa y di otro banda toch ta un desapunto pasobra bo mester duna toch e espacio pa trece un bon imagen awo aki pa tur hende haya sa e realidad. Den e caso aki, nos ta sigur cu esaki lo wordo bon maneha for di awor cu intencionnan totalmente sincero pa duna pueblo y Hulanda realmente e cifranan realistico di con nos ta para finacieramente. Nos mester ta mas sincero cu otro. Pa nos presenta cifra riba papel pa despues presenta con e realisacion a bay, cu no a cumpli toch, ta miho nos trece e imagen di biaha realistico asina no ta gaña niun hende y ni nos mes. Gobierno di AVP a gaña Hulanda y Hulanda a kere den nan, a hiba nos unda nos ta awe, den un debe asina grandi”, Parlamentario Setty Christiaans-Yarzagaray a termina ta bisa.