Cas di Partido AVP ta celebra nos Dia Nacional hunto cu pueblo

ORANJESTAD – Un biaha mas Cas di Partido AVP ta e centro di atencion dia nos Himno y nos Bandera. Pa hopi aña caba, e partido berde ta organisa un fiesta di kita sombre pa celebra nos Dia Nacional. Partido AVP a para na cuna di nos Status Aparte y pa decadanan a hiba un lucha fuerte pa su logro. Na 1947 2147 hombernan Arubiano balente bou guia di Henny Eman sr., Shon A Eman y Aristide Wever a firma un peticion cu hunto cu un mocion a keda entrega na Su Mahestad y durante un reunion di Mesa Rondo riba 18 di maart 1948 na Den Haag door di Shon A Eman. E deseo di e pueblo humilde pero determina a wordo scucha. Ta pesey cu e dia special aki ta wordo celebra den forma unico, unda cu ta presenta tur loke cu tin di haber cu cultura di Aruba – baile, musica y cuminda – yena di ambiente di un pueblo orguyoso.
Un cantidad sumamente grandi di persona tur aña di nobo ta yega Cas di Partido AVP pa celebra tur cu tin nos Dia Nacional. E acumulacion enorme y constante di hende ta loke ta resalta. Ta bay tin stand cu cuminda y e stand di bolo di Norman Roos no ta falta. Bolo den tur tamaño, tur sabor, color y forma ta atrae e bishitantenan pa yega cerca y cumpra. Tambe ta bay tin un evento off road organisa door di un grupo di hoben deportivo. Riba e evento innovativo aki lo amplia mas despues.
Henter Aruba ta invita pa pasa na Cas di Partido den Rancho pa celebra hunto nos Dia Nacional. Ya for di 12or di merdia por pasa cumpra cuminda y e stand di bolo ta habri for di tempran caba. Bin pasa un dia di famia den un ambiente ameno, saborea di e cuminda crioyo y laga e dushi musica di folkflore suavisa bo oreanan. Partido AVP ta warda bo.