Home Local Departamento di Impuesto ta reanuda su servicio di caha na DIMAS Entrante...

Departamento di Impuesto ta reanuda su servicio di caha na DIMAS Entrante diamars 13 di maart 2018

ORANJESTAD –Departamento di Impuesto ta anuncia cu entrante diamars 13 di maart 2018 ta reanuda su servicio di caha situa den e edificio di DIMAS na Paardenbaaistraat 11. E servicio di caha aki ta unicamente pa e clientenan di DIMAS. Pues, e clientenan aki lo no mester bay mas na e oficina di Departamento di Impuesto na Camacuri. Tur cliente lo tin e oportunidad pa por haci pago adelanta na DIMAS mes prome cu atende nan cita pa un servicio of producto.

Departamento di Impuesto tin un bali ubica den e sala di espera y asina facilita tur cliente cu tin mester di haci pago manera di:
– Gastonan administrativo (retributies)
– Gastonan pa permiso (leges) y
– E suma di deposito (waarborgsom)

E pagonan lo por wordo efectua unicamente cu tarheta di debito. Pues, lo no ta posibel pa paga cu placa efectivo. E orario di servicio na DIMAS ta:
7:45 am – 11.30 am
1.15 pm – 3:00 pm
E clientenan cu ta paga cu cash mester acudi na MFA Noord, Paradera of Savaneta of na e oficina di gobierno na Santa Cruz of San Nicolas.

Departamento di Impuesto ta haci un apelacion na tur cliente pa tuma bon nota di e cambionan den e servicio di pago aki pa evita cualkier inconveniencia.

Por sigui tur informacion di Departamento di Impuesto riba e pagina di Facebook: https://www.facebook.com/impuestoaruba/ pa keda bon informa.