Home Local Mehora experiencia di pashent ta meta principal Hospital cu encuesta via telefon...

Mehora experiencia di pashent ta meta principal Hospital cu encuesta via telefon entre pashentnan di policlinica

SHARE

ORANJESTAD, Aruba: Dr. Horacio E. Oduber Hospital ta trahando duro patras di cortina ya pa algun tempo caba pa mehora e experiencia di cada pashent. Esaki ta conta pa e pashent cu ta yega hospital pa ricibi un tratamento, pashentnan cu ta wordo interna y alabes pashentnan cu ta bishita e policlinicanan. E biaha aki hospital kier enfoca riba e pashentnan cu ta tuma contacto telefonicamente cu nos policlinicanan. Den cuadro di esaki Hospital ta organisando un encuesta completamente anonimo desde 13 di maart pa 30 di maart cu meta final pa mehora e servicio telefonico. A selecta 3 poliklinica pa participa den e encuesta aki cu ta Poli Gynaecologie, Poli Urologie, y Poli Long.

Charlaine Huntington, gerente di e departamento di comunicacion, a duna di conoce cu ya pa algun aña Hospital tin su encuesta “Dune bo opinion” pa pashentnan cu ta wordo interna pa asina midi e calidad di servicio cu ta ser brinda. E biaha aki a dicidi di enfoca riba e servicio telefonico cu ta ser brinda na nos policlinicanan. Pa e encuesta aki a scoge Poli Gynaecologie, Poli Urologie, y Poli Long. Si un pashent a bishita durante luna di Januari y Februari un di e clinicanan aki e por spera yamada di un tercer persona cu no ta traha na hospital cu lo bay haci e encuesta aki pa nos. Un encuesta completamente anonimo cu un total di 20 pregunta.

E preguntanan ta basa riba con lihe a contesta telefon, si e pashent a ricibi e servicio desea via telefon y mucho mas, pues preguntanan al caso cu por yuda e policlinicanan mehora nan servicio, den e caso aki di telefon.

“E encuesta ta completamente anonimo, pues ta pidi encarecidamente pa participa y duna bo opinion manera cu a experiencia esaki, pa motibo cu e opinionnan aki di nos pashentnan lo yuda mehora e servicio cu ta brinda via telefon”, Charlaine Huntington a menciona.

“Si bo persona a yama y nan no a contesta, duna esaki di conoce. Si nan a trata bo tremendo, tambe nos kier tende, pasobra esey por duna e secretaria di e poli un empuhe pa sigui haci un bon trabou”, asina Charlaine Huntington a duna di conoce. Di antemano danki pa contribui na e encuesta aki y si tin cualkier pregunta por tuma contacto libremente cu departamento di Comunicacion na Hospital.