Jeon merece hopi mas pa e promocion cu e ta haciendo pa Aruba y nos dushi Papiamento
ORANJESTAD – Diaranson anochi un publico grandi a prsenta dilanti bestuurskantoor pa duna Jeon un bon bini na e acto di reconocimento caminda Gobierno di Aruba nombra Jeon como Embahador di Bon Boluntad di nos pais. Un publico hopi grandi tabata presente na momento cu a Jeon y Minister Xiomara Ruiz-Maduro a yega den limousine y manera cu e merece, un artista grandi, ela wordo ricibi riba red carpet.
Minister Presidente mr. Evelyn Wever-Croes a presidi e comitiva di recepcion cu a duna Jeon un bon bini. Un cantidad di miembronan di Prensa tabata presente pa cubri e yegada y henter e evento, canalnan di television y radio tabata en bibo for di bestuurskantoor. Jeon a saluda y saca potret cu e publico cu tabata spere cu yen di enthousiasmo y alegria, tabata un momento hopi emocionante. Despues cu Jeon a saluda e publico presente, ela wordo dirigi na su asiento y e bunita evento a inicia cu interpretacion di Himno di Aruba pa e hoben Roseanne Croes acompaña riba guitarra pa meneer Rincones. Maestronan di ceremonia Juelle Thode y Andrew Vrolijk a presenta en breve un biografia di Jonathan Bryan Jeon Thiel y despues a sigui un presentacion di video riba un pantaya gigante cu a wordo instala dilanti bestuurskantoor.
Minister Xiomara Ruiz- Maduro a hiba un elocuente discurso den cual na inicio ela trece dilanti cu e no ta Anita, ni conoce Julissa, pero e ta Xiomara y ela bay busca Jeon na hotel den limousine pa trece bestuurskantoor pa e ricibi e reconocimento y e esaki ta chikito compara cu locual Jeon merece. Palabranan bon escogi y emocionante a wordo encanta y aprecia pa e publico cu tabata bati man y expresa nan aceptacion grandi pa e frasenan escogi pa e mandatario encarga cu nos cultura.
Minister Presidente mr. Evelyn Wever-Croes a hiba palabra dunando reconocimento na Jeon pa su produccion Machika promoviendo nos pais Aruba internacionalmente, pa cuaal motibo Gobierno di Aruba a nombra Jeon como Embahador di Bon Boluntad. Di parti gobierno Jeon a ricibi un bunita recuerdo. Ademas Jeon a wordo obsequia un bunita holoshi di parti gobierno di Aruba y Breitling Boutique Aruba.
Minister Dangui Oduber mandatario encarga cu Turismo tambe a hiba palabra y a gradici Jeon pa e promocion impagabel cu Aruba ta ricibiendo di Jeon pa medio di e produccion Machika. Despues di e recococimento Jeon a hiba palabra y avexpresa di ta hopi contento di ta bek na Aruba y a gradici e pueblo y Gobierno di Aruba pa e reconocimento grandi aki. Jeon a motiva cada hoben cu si bo tin talento sigui traha riba dje y bo soño lo bira realidad. Jeonn su discurso a manda un mensahe cu a cay bon den e publico:”Haci algo pa bo luga ennvez di keda critica!”. Kiermen envez di critica ban haci algo positivo pa nos pais.
Na final Jeon a sorprende e invitadonan y e masa di publico cu su exitonan hunto cu e banda Upgrade Music y no por a keda afor e cancion y produccion Machika cu a hiba nos pais y papiamento riba tarima internacional. Un espectaculo impresionante dunando un yiu di tera, un hoben talentoso un reconicimento cu e merece. Minister Xiomara Ruiz-Maduro ta yama Aruba danki pa a presencia e nochi na Bestuurskantoor. Den su palabranan e mandatario a expresa: “nos a briya como Pais ayera…den union nos a brinda un bunita homenahe na un hoben artista Arubano…Pabien Aruba…Pabien Jeon…nos a #Machika”.