Home Local Parke Nacional Arikok: Conservando nos Simbolo Nacional pa e Futuro Generacion

Parke Nacional Arikok: Conservando nos Simbolo Nacional pa e Futuro Generacion

SHARE

ORANJESTAD – Fundacion Parke Nacional Arikok (FPNA) a tene un workshop recientemente cual a hiba un topico hopi importante esta nos simbolo nacional e Shoco cu ta hiba e nomber scientifico Athene cunicularia arubensis. Na aña 2011 Aruba Birdlife Conservation (ABC) a lansa un campaña pa salvaguardia e Shoco di bira un especie extincto. Na aña 2012, apenas un aña despues cu a lansa e campaña e Shoco a wordo declara como un di nos simbolonan nacional di pais Aruba.

FPNA den collaboracion cu ABC, usando e expertisio y conosemento combina ta hibando e esfuersonan di conservacion di nos simbolo nacional na e sigiente nivel na unda FPNA ta reconose cu proyectonan pa conserva nos naturalesa no ta tuma un paar di aña sino algun decadanan. E Shoco workshop a wordo organisa dor di Sr. Gian Nunes – Research and Conservation Manager di FPNA. Den transcurso di un sondeo Sr. Nunes a drenta den contacto cu Sr. David Johnson kende ta e director di Global Owl Project y un experto di Shoco cu a inverti mas di 40 aña den sondeo di Shoco. Sr. Johnson a fungi como un di e facilitado hunto cu un profesora di New Mexico State University (Department of Fish, Wildlife and Conservation Ecology), Dr. Martha Desmond, un expert den e area di ornitologia cual ta e sondeo cientifico di parhanan y di Shoco.

E importancia di e workshop a keda comproba na momento cu a presenta un situacion alarmante na Aruba Airport Authority N.V. na unda empleado a encontra dos neishi di shoco den e area caminda construccion lo mester tuma lugar. Mesora a cuminsa tur e tramitenan pa asina por realoca e dos neishi nan di Shoco. Ta importante pa remarka cu te na e momento nan aki e relocacion di e Shoconan ta bayendo bon usando asina e miho practicanan den ramo di conservacion di Shoco instrui dor di Sr. Johnson. Sr. Johnson ta remarka cu e Shoco no solamente ta un especie den peliger, pero cu e situation di e Shoco ta criticamente na peliger, cual ta duna tur esfuerso di conservacion y protection di e Shoco mas balor cu nunca y cu a ser anticipa.

E workshop a consisti di 5 dia completo, caminda participantenan a ricibi diferente presentacion y experienca den veld. Na final di e workshop 22 participante a comberti nan mes den “Shoco Conservation Master” unda cu nan lo sigi enfoca ariba e importancia pa cu e conservacion di simbolo nacional pa awe y e futuro generacion. Un danki inmenso na cada un di e participantenan pa a demostra nan dedicacion, passion y entusiasmo durante e workshop.

FPNA finalmente kier a duna un palabra di gradicimento na Aruba Birdlife Conservacion, Ministerio di Desaroyo Territorial, Infrastructura y Medio Ambiente, Directie Natuur en Milieu, Veterinaire Dienst Aruba, Dienst Openbare Werken, Santa Rosa (LVV), Aruba Airport Authority N.V. y Universidad di Aruba pa tur cooperacion y esfuersonan brinda durante nos Shoco workshop. Sin laga afo, un danki inmenso ta bai na “Shoco Beer” pa nan donacion na unda cu FPNA por a organisa e Shoco workshop como tambe e continuacion di e projecto pa conserva e Shoco.