Apesar di e desastre financiero cu a hereda, Gobierno di Aruba den su totalidad a bay di acuerdo pa aumenta substancialmente e presupuesto di Ministerio di Asuntonan Social demostrando asina e compromiso y determinacion pa ehecuta y logra solucionnan fundamental pa e crisis social cu Aruba a hereda for di un Gobierno cu pa 8 aña largo no a haci nada riba e tereno aki.
“Lo aumenta e presupuesto cu 30 miyon florin adicional, reparti riba presupuesto di aña 2018 y 2019 pa por contra-ataca nos problema social”, Minister Glenbert Croes a declara.
Pa por logra cambionan positivo, alivio pa nos hendenan cu ta den necesidad, un miho biba pa nos pueblo, mester tin e boluntad pa hunto tuma pasonan grandi.
Ademas di e ampliacion di Canasta Basico cu producto y servicio, ademas di e aumento substancial di salario minimo cu lo keda introduci na un forma structural, hunto cu e incentivonan pa stimula comercio, hunto cu estimulonan economico cu na e momentonan aki ta tranca, hunto cu e aumento di Asistencia Social (bijstand) cu ta mara na salario minimo, hunto cu e logro grandi di reconexion di awa y coriente pa nos pueblo cu awo no tin, nos ta sinti cu nos ta riba e bon caminda pa realmente haci algo cu lo por alivia e situacion di hopi famia aki na Aruba den un forma digno.
“Mare mi por a anuncia un milager, pero den 100 dia esey no ta posibel”, Glenbert Croes a declara. Pero si evalua e paso y decisionnan ya tuma pa e Gobierno aki, a logra hopi mas den 100 dia cu e 8 añanan di e Gobierno anterior.