Ya desde algun aña ta manda varios pashent di Boneiro pa ricibi tratamento specialisa na Aruba!
ORANJESTAD, Aruba – Hospital a ricibi bishita di Secretario di Estado di Hulanda, encarga cu maneho di “Volksgezondheid, Welzijn & Sport”, esta Drs. Paul Blokhuis. Durante e recorido aki a suministra hopi informacion riba e trabounan cu Hospital ta haciendo. Drs. Blokhuis ta na Aruba den cuadro di un bishita di trabou, el a pasa bishita otro islanan den Caribe Hulandes tambe. E ta desea di haya sa mas over con ta bayendo cu e calidad di cuido cu e pashentnan ta ricibi y alabes e cooperacion entre e diferente islanan.
Director Financiero di Hospital, Drs. Theo de Kool a duna di conoce cu e Secretario di Estado tabata interesa di haya sa con hospital ta maneha procesonan di calidad. A duna un splicacion amplio riba e retonan cu tin pa por tin suficiente empleado cualifica, pa haya e empleadonan corecto pa por brinda miho cuido.
Un di e puntonan importante tabata e “New Bed Tower”, unda tabatin un recorido den e parti nobo pa asina Drs. Blokhuis por a mira e diferencia entre e edificio bieu y nobo. Sr. de Kool a duna di conoce cu nan a ricibi hopi pregunta riba e diferencia entre e situacion di Hulanda ciompara cu Aruba.
Un bishita cortico di e Secretario di Estado compaña pa un delegacion amplio pero sigur sumamente intersante y na unda hopi informacion a ser duna pa Hunta di Directiva di Hospital di Aruba. Sr. de Kool ta convenci cu a suministra suficiente informacion pa e Secretario di Estado di Hulanda ta bon informa kico tur ta haci den nos hospital nobo y moderno y alabes a pidie ayudo riba algun tereno cu e por tin influencia riba dje.