Prome reunion a tuma lugar cu Minister Dangui Oduber y e comision di BIG

Diahuebs ultimo Minister encarga cu Turismo, Salubridad Publico y Deporte Sr. Dangui Oduber a tene su prome reunion pa cu e implementacion di e ley ARUBIG. E comision cu a wordo institui ta consisti di diferente exportonan riba tereno di salud cu tin e tarea pa conseha Minister di Salubridad con pa reformula e ley di AruBIG pa por amplia e registration di BIG dunando chens na nos studiantenan cu a completa nan estudio den Region, Europa y/of Merca pa por traha den nos sistema di cuido pa asina aporta na un miho calidad di cuido pa nos cuidadanonan. Expertonan den e comision lo duna nan conseho na Minister Dangui Oduber dentro di un termino di 3 luna. E comision ya menciona tin tambe como tarea pa conseha Minister di Salubridad ariba e miho forma con pa institui e asina yama “kwaliteitsinstituut” cual lo ta responsabel pa acredita diploma di esnan trahando den e sector di cuido. Manera a yega di menciona anteriormente, Corsow ya caba tin e ley aki di BIG adapta na e situacion di studiantenan cu a finalisa nan studio den exterior. Minister Dangui Oduber ta compromete su mes na sigi informa nos pueblo di e progreso di diferente puntonan di accion riba agenda pa cu mehoracion di nos calidad di cuido medico.