Comision fiho di Parlamento pa loke ta Asuntonan Economico, Finansa y Organisacion Gubernamental (CEZFO), presidi pa parlamentario Sra. Daphne Lejuez, a ricibi directiva di Camara di Comercio pa asina por a haya un miho bista riba e retonan cu empresarionan ta experencia cu por ehempel burocracia, leynan anticua y procesonan cu mester wordo agilisa pa asina por stimula mas actividad economico y tambe mehora e clima di inversion mediante entre otro reforma fiscal.
Tambe a palabra pa papia mas tocante estimulo pa San Nicolas y posibel alternativanan cu lo por genera actividad economico pa San Nicolas y tambe pa Playa, mirando cu Camara di Comercio tin diferente comision trahando riba e temanan aki. A toca e tema di diversificacion economico usando por ehempel innovacion den area di agricultura pero tambe den area di desaroyo tecnologico manera e-government, e-commerce y e importancia di un vision innovativo y empresarial den sector di enseñansa pa por sostene e desaroyo aki.
E comision parlamentario (CEZFO) proximamente lo invita varios otro stakeholders pa asina por forma un miho bista riba e necesidadnan pa por crea mas desaroyo economico y asina conhuntamente traha riba posibel recomendacionnan riba nivel di legislacion cu lo complementa e metanan proponi den e acuerdo di gobernacion y contribui na duna e impulso necesario pa stimula nos economia y crea mas cupo di trabao.