Parlamentario Endy Croes ta splica cu AVP a laga pais Aruba den un estado critico. Rotzooi ta keda un palabra chikito pa trata na splica ki tipo di maneho a ser hiba den e ultimo añanan mientras ‘Choller’ kisas ta keda mucho nechi pa e ex-gobernantenan di AVP. Hende no mag ta rencoroso pero ta yena mi persona cu hopi repudio ora cada dia cu pasa un otro ‘cadaver’ ta wordo encontra den lachi.
Gastonan di 1000 miyon florin
Recientemente Algemene Rekenkamer Aruba (ARA) a publica un rapport riba proyectonan di Mike Eman y AVP, esta e proyecto “Bo Aruba”. Bo Aruba ta tur proyecto di infrastructura desde 2009 pa 2017. Inversion total ta 1.6 Biyon florin mientras cu e rapport ta splica cu e gastonan te cu awor ta 1 BIYON of miho bisa: 1000 MIYON florin! Cuminsamento di 2017, momento cu Algemene Rekenkamer a termina e rapport, semper ta usual y profesional pa laga e minister encarga lesa esaki y duna su comentario pa asina si mester ahusta e rapport por haci esaki ainda cumpliendo strictamente cu Fundamentele Beginselen, entre otro Integriteit, deskundigheid y zorgvuldigheid pa nombra algun. Benny “Al Capon” Sevinger a ricibi na 3 ocasion un carta di Algemene Rekenkamer pa duna su comentario fecha 21 februari 2017, 28 maart 2017 y 7 juni 2017. Lamentablemente a la estilo di Mafioso, Benny a opta pa no duna ningun reaccion y/of comentario al respecto. Tristo cu den un Pais civilisa como mandatario Bo ta comporta Bo mes di e forma aki. Esaki ta tipifica Benny su propio expresion recientemente den parlamento: “I Don’t Give a Damn”.
Maneho dictatorial
No obstante esaki Parlamento di e tempo aya kende mester a nombra 2 profesional extra pa forma e Collegiaal Bestuur di 3 persona di ARA pa asina di acuerdo cu Ley y Staatsregeling nan por funciona y por a publica e rapport aki, esaki no a tuma lugar y e berdad ‘curu’ a keda scondi pa pueblo di Aruba te despues di eleccion. Tur e factornan aki a stroba pueblo scoge nan gobierno mas obhetivo posibel, pasobra si pueblo tabata sa e contenido di e rapport prome cu eleccion probablemente AVP no a perde 10 mil voto pero kisas 20 mil voto. Parlamentarionan di AVP tras di instruccion di Mike Eman y Benny Sevinger a percura pa NO nombra e personanan aki pa asina prohibi Algemene Rekenkamer indirectamente pa publica dicho rapport. Asina Aruba tabata wordo maneha al estilo di dictadura.
Hopi riesgo financiero
Algun conclusion di e rapport di Algemene Rekenkamer Aruba ta cu e plan Bo Aruba ta expone Pais Aruba na hopi riesgo financiero cu no ta bon cubri. Parlamento nunca a haya tur informacion y pues Parlamento a wordo engaña y no a wordo bon informa. No tin transparencia y no ta duna cuenta financiero ta otro puntonan di hopi preocupacion y ningun caminda Gobierno anterior a splica con lo bay paga e proyectonan aki bek. 1 BIYON florin te cu awor of tambe 1000 MIYON florin den proyecto Bo Aruba. E pueblo aki no por come klinker. Asina AVP a mara gobiernonan di turno na man cu pia den e corupcion di siglo. Inteligencia, Perseverancia, Pasenshi y Comprension trahando duro tur dia nos lo percura di rescata e pais aki y saca nos pueblo dilanti, parlamentario Croes a termina bisando.