Esfuersonan enconhunto y cu seriedad nos ta restablece ordo den finanzas di Aruba
ORANJESTAD- Na entrada di Gabinete Wever-Croes a encontra un situacion tur bruha y no tabata tin bista real di e situacion financiero di nos pais apesar cu tabata sa cu e situacion tabata hopi preocupante. Minister Ruiz-Maduro cu su team di expertonan y departamentonan concerni a haci un inventarisacion y diferente ehercicio cual a duna como resultado cu nos pais Aruba ta pasando den su peor crisis financiero den historia. Durante e gobernacion di partido AVP 2009 – 2017 nos debe nacional a prácticamente redobla di 49 % pa 87% di nos “GDP” y Aruba a conoce deficitnan den presupuestonan di mas grandi den nos historia y den esaki no ta inclui ainda e proyectonan PPP manera e.o. Green Corridor, Hospital y Watty Vos Boulevard.
•Herencia laga atras tabata un finanzas publico fatal!
Gobierno di AVP no tabata transparente, mucho menos sincero den publicacion di cifranan real y deliberadamente a scoge pa no publica rapportnan di instancianan internacional manera IMF, S&P, Fitch y hasta di CAFT, kendenan den nan raportnan a bin ta mustra nan preocupacion y a alerta cu e rumbo cu pais Aruba ta bayendo ta alarmante. Durante Gabinete Mike Eman, pais Aruba a conoce un gobierno cu a goberna a base di fia placa pa loco y no tabata tin e habilidad di mantene e situacion financiero dentro di normanan sostenibel. Esaki a conduci cu un instruccion a bini di Reino y pa medio di un ley caminda un supervision financiero a wordo impone riba nos pais y cu esaki a mishi cu e budgetrecht di parlamento y nos a perde nos autonomia financiero.
•Deficit total di mas di 450 miyon pa 2017 y 2018
Despues di un analisis di expertonan y instancianan concerni a bin resulta cu gobierno anterior a laga un Presupuesto Supletorio 2017 cu un deficit extra di 130 miyon y pa Presupuesto 2018 un deficit di mas di 450 miyon.
Transparencia y presenta e situacion financiero manera cu e ta, ta punto di salida di e gabinete nobo. E ehercicionan y inventarisacion haci pa e gobierno nobo y expertonan a duna como resultado cu aña 2017 a sera cu un deficit extra di 130 miyon florin contrario na un deficit di 25 miyon cu e gobierno anterior a presupuesta. Asina mas sorpresanan no alentador, e gobierno nobo a haye confronta cune, un Presupuesto 2018 cu un deficit di casi 300 miyon florin. Ta mustra cu tin hopi mas cadaver cu Gabinete Mike Eman a laga atras cu ainda no a sali na cla. Pa awor caba e total di deficit extra di 2017 y deficit di 2018 hunto ta alrededor di 450 miyon florin.Siman pasa mes a bin sali na cla cu e bureau Bo Aruba a costa pueblo di Aruba 1 miyon florin segun e raport di Contraloraria General.
•Maneho financiero nobo ta basa riba e realidad y proyecta den presupuesto
Gabinete Wever-Croes pa medio di su Minister di Finanzas, Asuntonan Economico y Cultura sra. mr. Xiomara Ruiz-Maduro desde inicio a bin ta traha duro pa asina por yega y reestablece ordo den nos finanzas publico. Den su maneho Gobierno ta hiba un maneho den margen di leynan y conforme e presupuesto cu ta wordo aproba pa Parlamento, teniendo cuenta cu e obligacionnan den futuro. Den e maneho financiero e ser humano ta keda central y e decisionnan cu wordo tuma ta tene cuenta cu e futuro di nos yiunan y nan yiunan den mente. E gabinete di MEP-POR-RED desde inicio a scoge pa den e maneho financiero demostra curashi y determinacion pa tuma decisionnan cu no por ser pospone mas. Den e trayecto aki no lo permiti pa esnan cu a hinca nos pais den e crisis financiero aki bin sigui bruha tera. Ta un barbaridad y hasta cuestionabel cu opositornan kier trece pa pueblo cu situacion financiero caotico aki a wordo crea den e ultimo 10 simanan cu e gabinete Wever-Croes tin sinta den gobernacion. E pueblo sa bon cla cu e crisis financiero ta loke Gobierno di Mike Eman a laga atras.
•Pueblo tin derecho riba husticia y esnan culpabel mester para responsabel
E mal maneho hiba pa e gobierno anterior a hinca nos pais den un debacle financiero cu consequencianan grandi pa e pueblo y futuro generacion. Investigacionnan lo mester tuma lugar y si e resultado duna cu e gobernantenan di AVP a haci nan mes culpabel na corrupcion y/o violacion di e.o. nos leynan di contabilidad, nan tin mester di para responsabel pa nan actonan. No por ta asina cu gobernantenan cu ta haci tanto daño na nos pais y ta laga esaki sin cu nada ta wordo haci. No ta cuestion di persigui hende, pero mas bien nos pueblo tin derecho y ta husticia su deber pa haci nan trabao pasobra ley ta conta pa nos tur.