Home Entertainment Bob y Virginia Pridham ta turistanan fiel na Aruba Riu Palace Aruba...

Bob y Virginia Pridham ta turistanan fiel na Aruba Riu Palace Aruba a reconoce huespednan di 20 aña largo

SHARE

ORANJESTAD, Aruba – 5 di Februari 2018: E huespednan Bob y Virgnina Pridham ta biniendo Aruba pa 20 aña caba y nan a scoge Riu Palace Antillas como nan hotel. Riu Palace Antillas conhuntamente cu Aruba Tourism Authority a reconoce Bob y Virginia Pridham kende a scoge Aruba pa 20 aña como nan destinacion preferi.

Riu Palace Antillas ta orguyoso cu como bishitante, Bob y Virginia Pridham ta disfruta di nan estadia cerca nan, biniendo pa 20 aña, asina Shari Shield, Sales Manager di Riu Hotels & Resorts Aruba a indica cu orguyo. E turistanan a scoge Riu Palace Antillas pasobra nan ta disfruta di ta na e banda di adulto.

Antes nan tabata keda na Riu Palace Aruba, pero nan gusta keda na Riu Palace Antillas pasobra e ta mas trankil y pa adulto so. “Nos ta contento cu nan ta bin e isla pa 20 aña. Esey ta hopi special cada bes ora bo ta tuma e mesun decision pa bin bek y mira e hendenan”, el a indica. Bob y Virginia Pridham ta manera famia pa Riu Palace Antillas.

Virginia Pridham ta contento pa bin Aruba pa 20 aña y pa su persona e reconocemento ta great. “Mi ta contento pa ta aki pa 20 aña”, Virginia Pridham a indica. E gusta e clima di Aruba, e staff di hotel ta fabuloso. Famia y amistadnan di Pridham a informa Riu Palace Aruba cu nan ta biniendo e isla pa 20 aña, cual e gerencia di e hotel a dicidi di reconoce nan. Durante nan bishita riba e isla, nan a keda na diferente hotel. Bob y Virginia Pridham a gradici Riu Palace Antillas pa nan reconocemento.

“Esaki ta mas di loke nos a spera”, asina turista Bob Pridham a informa ora ricibi e reconocemento pa bin Aruba durante 20 aña. E y su famia gusta Aruba y pa ricibi e reconocemento aki tabata un honor pa nan, pasobra esaki ta demostra cu realmente ta aprecia nan pa bin. “Aruba ta un isla bunita y ta duna bon bini cada bes cu nos bin”.

Ora cu nan a bin Aruba 20 aña pasa, nan a ripara cu e isla no tabata asina desaroya. E desaroyo ta increibel. “Nos gusta Aruba pa nos amigonan. Bo por bay den caya, cu prijs rasonabel cu bus of taxi”, el a indica. Loke mas nan gusta di Aruba ta e parti natural, e beachnan ta bunita.

Bob Pridham a informa su amistadnan cu Aruba ta e luga pa bay, pasobra e clima ta garantisa. E ta un luga amigabel, pero tambe sigur unda cu nunca nan a haya problema. Esaki ta nifica cu nan por sali sin problema, sin cu tin di worry y e hospitalidad ta excepcional.

Famia Riu a funda Riu Hotels & Resorts como un hotel chikito na aña 1953, na Majorca, Spaña. Awendia RIU, cu ta partner cu TUI, e compania di tours mas grandi na mundo, ta ofrece 95 hotel, di cual riba 70% ta ofrece acomodacion “All Inclusive”. Riu Hotels & Resorts ta bou maneho diario di e di tres generacion di famia Riu, cu su oficina principal na Majorca y ta conta cu riba 26 mil empleado y ta estableci den 19 pais, manera Spaña, Portugal, Irlanda, Alemania, Bulgaria, Turkia, Morocco, Merca, Mexico, Jamaica, Bahamas, Aruba, Costa Rica, Republica Dominicana, Panama, Cabo Verde, Mauritius, St. Martin y Sri Lanka.

Aki na Aruba, Riu Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.