E actitud positivo di IMF pa cu e cambio di maneho tabata remarcabel
Algun parlamentario di Fraccion di MEP, Sr. Rocco Tjon, Sra. Daphne Lejuez y Sra. Setty Christiaans-Yarzagaray a reuni cu un delegacion di IMF durante nan bishita anual unda nan ta reuni cu varios stakeholder pa evalua e estado financiero y economico di nos pais.
Nan actitud positivo pa cu e cambio di maneho tabata remarcabel, como tambe nan expectativa pa un plan financiero y economico mas realistico y responsabel, mirando cu esaki no necesariamente tabata e caso cu e gobierno anterior.
Durante e encuentro aki e parlamentarionan presente a enfatisa riba e compromiso y importancia di hiba un control berdadero, y cu e coalicion actual den parlamento lo no bira un stempel parlement manera a bin ta mira e ultimo añanan. Esaki muy en particular pa locual ta trata e maneho di gasto di e aparato gubernamental, cu ta un remarca persistente den e rapportnan di IMF.
Tambe a papia riba e necesidad pa reduci e “red tape”, manera acorda den e programa di gobernacion, pues reduci e burocracia den e aparato gubernamental, pa asina por aumenta eficiencia y agilisa procesonan pa na su turno por stimula establecimento di negoshi y como resultado tambe crea mas cupo di trabao den sector priva y tambe stimula diversificacion economico den e diferente areanan manera por ehempel agricultura, innovacion y diversificacion di nos turismo.