Home Politics Parlamentario Endy Croes: Bestuur di Lotto pa Deporte costando pueblo 600 mil...

Parlamentario Endy Croes: Bestuur di Lotto pa Deporte costando pueblo 600 mil florin pa aña

SHARE

Oranjestad: E bestuur nombra pa e gobierno anterior no kier entrega nan puesto, nan no kier bay cas. E bestuur a hiba e Minister di deporte corte, usando  4 oficina di abogado y un professor.

Endy Croes kier sa ken ta paga pa e gastonan aki, si acaso ta e placa pa deporte? of cada miembro lo cubri nan caso nan mes. E bestuur actual di Lotto pa Deporte ta costando pueblo mas di 600 mil florin pa aña, poniendo esaki den balance cu e bestuur di prome cu 2009 cual Endy Croes mes a forma parti di e bestuur anterior y esaki tabata costa pueblo 150 mil pa aña y comparando cu e bestuur actual, cu ta costa Aruba 4 biaha mas hopi.

Siman pasa Lotto a gaba cu nan a alcansa un benta di 50 miyon florin, cual ta bunita.  Pero e diferencia ta cu awe e grupo  di Canada ta maneha lotto y Aruba ta djes haya un cachicachi di e benta.

Segun e parlamentario, na 2001 ora e gobierno di MEP a sinta nan a haya e benta di lotto na 16 miyon florin y na 2009 ora cu e gobierno di signatura geel a baha nan a laga e benta na 42 miyon florin, caminda 8 % tbt bay pa Canada y e resto tabata keda na Aruba. E tempo ey e ganashi tabata wordo hinka den proyectonan, pa recorda Compleho Deportivo Frans Figaroa, Parke Curason na Jaburibari, Veld di Winston, e dos veldnan na Pos Chikito,  e Compleho Deportivo na Yara, e Compleho Deportivo na Simeon Antonio. E tempo ey a drecha tur e lusnan na tur e veldnan, pa nombra algun di e veldnan,  Estrella, Sportboys, Dakota, RCA, La Fama, San Luis, Caiquetio y tambe a instala lusnan nobo na Flatstone y na veld di Arsenal.

Endy Croes kier sa cuanto parke Lotto pa deporte a traha despues di 2009, cuanto ta e inversionnan real den deporte? Pakiko ainda nos muchanan tin cu bende rifa canti caminda?

Mientras e bestuur ta bringa pa keda sinta riba e stul cu no ta di nan, mescos cu e stul di Parlamento, ta stulnan pasahero nan ta paso ta pueblo ta dicidi. Un persona mester ta consiente na momento e haya e oportunidad di traha den cualke stul cu no ta di dje, e mester purba di haci su trabou lo mas mihor posibel y na momento cu su gobierno bay y e tin cu bay cune y asina laga e Minister nobo drenta cu su vision nobo y cu su hendenan di confiansa rond di dje, pa asina e por ehecuta su trabou.

Dentro di poco lo ta bay tin un veredicto di Hues den e caso di Lotto contra Minister di Deporte, mirando e ley cu ta atende cu lotteria, AB1988gt25, en dado caso cu si e veredicto lo bin desfaborabel pa banda di Gobierno, nan ta preparando caba pa haci un amienda chikito na e ley aki, cu ta permiti tambe cu lo por cuminsa cu un di dos lotto aki na Aruba. Segun e parlamentario tin contactonan pendiente caba cu companianan cu ta provide e tipo di sostennan aki, cu ta bin den un luna instala 200 machine, cu un sistema rond Aruba y cu contractnan manera tabata anteriormente pa 8 of 6 % hasta cu lo por bahe un tiki mas, pa asina laga un espacio berdaderamente pa nos deportistanan, nos federacionnan etc. Pa nan haya un gran parti di e sosten financiero, cual ta e idea pakiko na 1982 a lanta Lotto pa Deporte.