Home Politics Parlamentario Edgard Vrolijk di MEP: Mester bin cu un maneho structural...

Parlamentario Edgard Vrolijk di MEP: Mester bin cu un maneho structural y planifica pa por mehora nos infrastructura

SHARE

Den e conferencia di prensa di dialuna ultimo, parlamentario Edgard Vrolijk a elabora riba e problematica di Green Corridor, caminda e ta recorda cu dia 18 di februari proximo lo bay tin e ultimo reunion cu e lendersnan pa cu e proyecto di Green Corridor. For di awor caba sr. Vrolijk kier a recorda e Minister di Infrastructura cu lo warda su binimento den Staten manera cu a ser acorda den e ultimo reunion publico di Parlamento. Y esaki pa locual ta e negociacionnan cu ta ser hiba e lendersnan. Parlamento lo warda riba e informacionnan aki p’asina haya claridad y tambe cual ta e siguiente stapnan cu mester ser tuma conhuntamente cu Staten.

 

Asfaltamento pa loco

Siguientemente sr. Vrolijk a trata e situacion di infrastructura den e pais aki. E peticionnan den pueblo pa mehoracion di e infrastructura ta grandi, ya cu tin hopi caminda den hopi mal estado. Locual e parlamentario no kier pa pasa ta e sistema cu a sosode durante e gobernacion anterior (2009-2017) caminda algun siman prome cu eleccion ta topa cu rancamento di caminda, asfaltamento pa loco, sin ningun maneho, sin ningun planificacion y caminda ta wak ken a vota pa e partido na mando of no, ta benta asfalt pa cierto grupito y no ta sigui asfalta e resto di caminda. Alabes e parlamentario a constata cu e problema di sushedad ta hopi grandi den Santa Cruz Pariba, caminda den areanan hopi frecuenta pa turistanan tin hopi sushi benta, por ehempel ora bay Daimari y Sabanilla Abao. Ta haci un apelacion na e minister pa pone ploegnan disponibel pa haci e lugarnan aki limpi.

 

Camindanan den mal estado

No solamente esey, pero mester tene cuenta cu camindanan cu ta hopi frecuenta, por ehempel camindanan pa Parke Arikok, San Fuego, Picaron, Coba Lodo, Shete, Warawara, ya cu casi tur caminda den e barionan ey ta den hopi mal estado. Con por ta posibel cu a inverti den hopi klinkers den cierto areanan na Aruba y a haci e camindanan asina luhoso, pero no a pone atencion na e barionan den Buitenstad? Ta pidi e minister pa den e 4 aña aki hiba un maneho structural, planifica pa por yega na cumplimento di locual ta mehoracion di infrastructura den tur bario rond Aruba. Otro politiconan cu ta representa cierto barionan tambe mester bin padilanti y bisa kico nan kier pa nan bario. Esey ta engrandece locual ta mehoracion den gobernacion.

Finalmente, hopi biaha turistanan ta haya falta di borchinan di indicacion. Ta pidi e minister pa pone mas borchi pa e barionan caminda turistanan ta frecuenta. Antes tabata asina cu na stacionnan di gasolin por a haya un bunita mapa cu tur e caminda (zijwegen) indica. Minister y ATA por pensa riba un mapa similar cu ta indica e camindanan, specialmente e areanan pafo di Oranjestad.