Recientemente a tuma lugar un reunion entre e staatssecretaris Raymond Knops y e lidernan di fraccion di MEP, POR, RED y AVP. Motibo di reunion tawata pa cera conoci cu otro y pa cada lider di fraccion expresa con nan ta wak e arena politico actualmente.
Sr. Knops di su banda a duna di conoce cu pais Aruba tin retonan grandi su dilanti, mirando e debe halto y e deficit pa cu e presupuesto venidero. Venezuela y un crecemento di nos economia tambe ta dos punto cu, segun e staatssecretaris, lo trece desafionan cun’e
E planes nan cu gobierno a presenta na sr. Knops a cay den bon tera cerca dje, asina el a duna di conoce na e diferente lidernan di fraccion. Den futuro cercano esaki lo wordo presenta oficial na hulanda pa asina yega na un situacion financiero sano y cu un crecemento economico real.
Lider di fraccion di MEP, sr. Rocco Tjon MBA, di su banda a splica e staatssecretaris Hulandes, cu pa fraccion di MEP ta importante pa for di parlamento nan ta proactivo pa aporta pa plan nan na bienestar di pueblo wordo cristalisa. Di otro banda sinembargo ta hopi importante tambe pa asumi e tarea di controla e gobierno pa asina garantisa transparencia, integridad y bon gobernacion. Esaki tawata e motibo tambe cu e delegacion di Aruba, durante IPKO, a opta pa e werkgroep di integridad keda existi, y Aruba ta encabesa e werkgroep aki tambe.
Banda di e tema di integridad, Tjon a elabora tambe riba un politica nobo cu e ta para p’e y lo haci tur esfuerso pa mehora e lasonan entre tur partido politico den parlamento. Un politica a base di respet y profesional. Pa loke ta trata nos economia, mester explora posibilidadnan pa diversifica nos economia y enfoca riba nos sector primario, den cual e bon lasonan cu Hulanda por nifica hopi.
Por wak bek riba un reunion hopi fructifero, caminda tur partido na mesa a duna di conoce cu bienestar di Aruba mester ta na prome lugar. Hunto e lidernan di e fraccionnan den parlamento kier bay traha pa hiba Aruba padilanti y Hulanda, mirando e plan nan realistico y bon pa pais Aruba, tambe kier traha hunto pa su progreso.