Diasabra ultimo, como lider di fraccion, mi a tuma contacto mes ora cu Minister President Sra. Mr. Evelyn Wever-Croes pa informa mi mes tocante e desaroyonan pa cu Venezuela.
Dialuna mainta mi a haya un update mas amplio di e situashon actual. Ta asina cu for di 2016 tin basta preocupacion di Venezuela pa cu exportacion di material y mercancia raro. Den cuadro di esaki na 2016 nan a manda pidi un control mas extenso na frontera di Aruba, door di nos autoridadnan. Segun informacion ricibi nan no ta contento cu e manera cu a atende cu nan peticion y esey ta e motibo pakico e presidente a laga cera e fronteranan cu Aruba, Curaçao y Boneiro.
Minister President a informami cu diferente reunion a tuma lugar entre representantenan di Gobierno cu autoridadnan Venezolano pa asina mas liher posibel restaura e laso entre Aruba y Venezuela. Na mes momento aworaki tin un ekipo activa pa analisa y despues efectua cambionan necesario pa mehora e situacion na Barcadera pa asina combati criminalidad mas eficaz na nos frontera.
Como presidente di e comision fiho den parlamento pa loke ta asuntonan di Reino, mi a informa e parlamentarionan cu ta forma parti di e comision awe mainta di e puntonan menciona. Parlamento lo ricibi un presentacion for di Veiligheidsdienst Aruba durante IPKO. Den cuadro di e tema Venezuela, e comision lo invita e mandatarionan pa elabora riba e desaroyo den transcurso di otro siman.