Lo bay cuminsa henter un procedura nobo pa un destaho publico pa asina haya oferta pa bin mas pronto cu ta posibel cu un helicopter pa polis segun Minister di Husticia, mr. Andin Bikker. Diamars mainta na Centro di Husticia na Macuarima e mandatario a haya un presentacion pa un helicopter nobo pa cuerpo policial.
Segun Minister Bikker, esaki por ta realisabel dentro di un par di siman. Esey ta pone cu mester bay observa e leynan aplicabel y e ofertanan cu haya pa asina den e proximo simannan tuma un decision den conseho di minister pa Ministerio di Husticia. Un helicopter di polis ta esencial pa surveillance y lo yuda optimalisa e siguridad riba nos isla segun Minister Bikker. E di dos presentacion cu e mandatario a haya diamars mainta ta riba uzo di drones.
E splicacion tabata riba tur aspecto cu ta encera, ki tipo di drones por ta aplicabel pa e isla y cu e mester garantisa e siguridad cu kier yega na dje. E presentacion tambe a bay riba e aspecto di privacidad, y tur aspecto huridico cu mester observa ora ta haci uzo di drones. Tempo cu a introduci e camaranan rond di Aruba, e ehercicio aki a ser haci caba, pero cu drones tin cierto aspecto adicional pasobra ta aparatonan cu ta bula den espacio aereo. Pa loke ta e gastonan di e drones e ta pagabel segun Minister Bikker. Tambe e mandatario a haci un apelacion pa den un par di siman haya un oferta concreto pa mira di cua fondo por financia e drones nan.
Minister di Husticia tin na su disposicion e fondo di combatimento di criminalidad y tambe tin un fundacion cu ta den cooperacion cu ATA y AHATA cu por haya fondo disponibel pa financia proyectonan asina. Den presupuesto tambe ta pone esaki y pronto lo ta trata den parlamento. Segun Minister Bikker, su ministerio lo bay tuma pasonan urgente y concreto pa restaura siguridad riba nos isla uzando tecnologia.