Home » PROME MINISTER DI ARUBA HACIENDO TUR INTENTO PA TRECE NOS PASAHERONAN DI VENEZUELA BEK ARUBA Ta prohibi importacion no certifica di koper

PROME MINISTER DI ARUBA HACIENDO TUR INTENTO PA TRECE NOS PASAHERONAN DI VENEZUELA BEK ARUBA Ta prohibi importacion no certifica di koper

by Admin
0 comment 54 views

Diamars Gobierno di Aruba a wordo informa cu Venezuela a prolonga e periodo na unda e ta cera tur trafico areo entre Venezuela cu Aruba. Naturalmente e noticia aki a cay den mal tera cerca nos di Gobierno como tambe den nos comunidad henter. Gobierno tabata tin e speransa cu e medida aki lo a dura 72 ora so manera a wordo anuncia na principio. Mientras tanto tin 187 pasahero cu paspoort Hulandes kendenan ta pega na Venezuela y no por bin bek Aruba.

Prome Minister Evelyn Wever-Croes a informa cu Gobierno a expresa su lamento pa e decision aki a traves e consulado di Venezuela pa motibo cu esaki ta percudica asina hopi di nos Arubianonan.

E mandatario a hiba conbersacion tambe cu Canciller di Arreaza di Venezuela kende ta encarga cu e ministerio di asuntonan di relacionnan exterior. E mandatario a splika e Canciller cu e decision aki a afecta severamente nos pasaheronan kendenan ta pega na Venezuela.

Na su turno, sr Arreaza a pidi cooperacion di Gobierno di Aruba pa traha duro riba e tema di contrabando mirando cu ta desde aña 2016 Gobierno di Venezuela ta pidi atencion na Gobierno di Aruba di e tempo ey, esta Gobierno di Mike Eman, sinembargo Gobierno di AVP no a haci caso di e peticion aki di Venezuela siendo cu ya di e tempo ey caba tabata tin contrabando.
Prome Minister a splika Canciller Arreaza cu apenas e Gobierno aki tin 6 siman na mando y pa nos gobierno e combatimento di iligalidad, contrabando, insiguridad y criminalidad tin un prioridad hopi halto riba nos agenda. E Mandatario principal di nos pais a pidi Arreaza pa duna nos Gobierno tempo pa traha riba e peticion aki di Gobierno di Venezuela na unda cu Arreaza a comprende y ta dispuesto pa traha cu Aruba tambe pa yega na un solucion pronto.

Prome Minister a informa e Canciller cu Gobierno a tuma e decision den Conseho di Minister pa prohibi importacion no certifica di koper. Tur esnan cu kier importa koper mester presenta documentonan di origen, di certificacion sino no por importa koper. Consecuentemente, esnan cu ta horta koper na Venezuela y manda nan afo ilegalmente y purba importa nan na Aruba, no ta wordo permiti mas entrente inmediatamente. Gobierno Venezolano a aprecia e medida aki y a pidi pa Aruba continua riba e detayenan di areglo.
Na su banda, Prome Minister Evelyn Wever-Croes a enfatisa na e Canciller Venezolano cu esaki por pero e kier pa awo si pone un punto final na tene nos hendenan na Venezuela y a expresa cu e kier e personanan aki na Aruba prome cu diabierna. E Canciller a duna e mandatario algun sugerencia pa wak con por haci pa trece e pasaheronan aki bek nos isla. Hunto cu colega di Corsow Prome Minister Rhuggenaath, ta analisando pa wak con pa haci esaki posibel.

Prome Minister di nos pais ta haci un apelacion na Aruba pa por lo pronto abstene di bay Venezuela. Y na esnan cu ta eynan, pa nan purba regresa via otro destinacion mientras cu Gobierno di Aruba ta haciendo tur lo posibel pa trece nos hendenan bek Aruba. Esaki no ta facil door cu esaki ta un situacion y problema cu ta existi pa hopi aña cu lamentablemente e gobierno anterior di Mike Eman a neglisha por completo siendo cu nan tabata na haltura cu e situacion aki por a escala di e forma aki y nan no a haci nada.

Gabinete Wever-Croes awo ta sinta cu e problema aki y cu e situacion na unda tin 187 persona pega na Venezuala pero ta haciendo tur lo posibel pa yega na un solucion pa trece nos hendenan bek sano y salvo y mas pronto posibel.

Pa loke ta importacion di fruta y berdura, ya caba Gobierno ta den consulta cu esnan cu ta importa esakinan, por trece nan for di otro destinacion pa asina nos no sinti e scarcedad.

Esaki ta un otro tema cu lamentablemente e Gobierno di AVP no a atende cu n’e aunke nan tabata na haltura di e situacion. Pero, poniendo e ser humano central y e bienestar di Aruba na prome luga, Gabinete Wever-Croes lo atende cu e problema aki pa yega na un solucion mas lihe posibel.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio